Afrıka ashtyqpen kúresýde Batystan kómek suraıdy
ASTANA. 9 qyrkúıek. QazAqparat - Afrıka múıisi elderi úkimetiniń ókilderi ashtyqpen kúresý strategııasyn ázirleý úshin Naırobıge jınaldy.
Euronews habarlaǵandaı, Kenııa SІM basshysy Mozes Vetalýnga halyqaralyq qaýymdastyqtyń kómeginsiz Afrıka gýmanıtarlyq apatpen kúrese almaıdy dep esepteıdi.
«Biz NATO Lıvııadaǵy operatsııany uıymdastyryp, Kaddafıdi qulatýǵa mıllıardtaǵan dollardy shyǵyndap jatqanda, Afrıkada ashtyqtan qyrylyp jatqan halyqty qutqarýǵa azdaǵan aqshany esh qıyndyqsyz taba alatynyn álemniń esine salýdan sharshamaımyz. Eger Amerıka Irak pen Aýǵanstandaǵy óz jobalaryna mıllıardtardy shyǵyndap jatsa, demek, onyń Afrıka múıisiniń qurǵaqshylyq jaılaǵan aýdandarynda bóget salýǵa, Somalıdegi jaǵdaıdy qalpyna keltirýge, azyq-túlik ónimderiniń óndirisine kómektesýge jáne eldi mekenderdi abattandyrýǵa sol aqshanyń azǵantaı bóligin shyǵyndaýǵa áleýeti jetedi degen sóz», - dep málimdeıdi sheneýnik.
Eske sala keteıik, Afrıka qurlyǵy sońǵy 60 jylda bolmaǵan qurǵaqshylyqty bastan keshýde.
