Afınyda bolǵan qaqtyǵysta 16 polıtseı men narazylyq aktsııasyna qatysýshy 5 adam jaralandy
ASTANA. Jeltoqsannyń 7-si. QazAqparat - Afınyda anarhıster men polıtsııanyń arasynda bolǵan qaqtyǵystarda 16 polıtseı men polıtsııa oǵynan 15 jasar jasóspirimniń qaza bolýynyń birjyldyǵyna baılanysty keshe uıymdastyrylǵan narazylyq sharasyna qatysýshy 5 adam jaraqat aldy.
Anarhıster bankter men dúkenderdiń vıtrınalaryn syndyryp, eki avtokólikti zaqymdady, qalanyń ortalyq kóshelerindegi qoqys salynatyn jáshikterge órt qoıdy.
Arnaýly jasaqtarǵa janatyn qospa quıylǵan shólmekter men tastar laqtyryldy, polıtseıler olarǵa kózden jas shyǵaratyn gaz qoldandy.
Polıtsııa habarlaýynsha, Afınydaǵy tártipsizdikter barysynda 134 adam, al osyndaı qaqtyǵystar oryn alǵan Salonıkıde taǵy 80 adam tutqyndaldy.
Afınyda sherýshiler Afıny ýnıversıtetiniń ǵımaratyn basyp alǵan, grek jalaýyn túsirip, onyń ornyna anarhısterdiń qara-qyzyl tústi týyn kótergen. Ǵımaratty basyp alý kezinde buzaqylar ýnıversıtet rektoryn soqqyǵa jyqqan, ol jan saqtaý bóliminde jatyr. Oqý ornynyń kúzetshisi de zardap shegip otyr.
