Afınanyń týrıstik aýdanyndaǵy Zevs ǵıbadathanasynyń mańynda jarylys boldy
ASTANA. KAZINFORM – Afınynyń ortalyǵyndaǵy týrıstik aýdanda eki qabatty turǵyn úıde jarylys bolyp, ǵımarat qulaǵan. Oqıǵa saldarynan alty adam qaza tapty, dep habarlaıdy Reuters agenttigi.
Grekııa órt sóndirý qyzmetiniń málimetinshe, qutqarýshylar úıindi astynan alty adamnyń denesin tapqan. Buǵan deıin olar páterlerdiń birinde turǵan egde jastaǵy erli-zaıyptyny jáne basqa páterde ornalasqan tórt týrısti izdegen.
Órt sóndirý qyzmetiniń ókili Vasılıs Vatrakogıannıstiń aıtýynsha, izdeý-qutqarý jumystaryna jedel qyzmet mamandary men kınologtar jumyldyrylǵan. Sondaı-aq kameralar men arnaıy datchıkter qoldanylǵan.
Jarylystyń naqty sebebi ázirge anyqtalǵan joq. Órt sóndirý qyzmetiniń tergeý toby oqıǵa ornynda jumys istep jatyr. Buǵan deıin jarylys bolǵan jerde gazdyń ıisi sezilgeni týraly habar túsken. Afıny meri jarylys gaz ınfraqurylymyna baılanysty bolýy múmkin ekenin aıtty.
Qaza tapqan tórt týrıst AQSh-tan kelgen eki erli-zaıypty bolǵan. Olar juma kúni jergilikti ýaqyt boıynsha saǵat 15:00-de Afıny áýejaıynan ushýy kerek edi, alaıda reıske kelmegen. Bul týraly polıtsııadaǵy derekkóz habarlady.
Jarylys juma kúni Plaka aýdanynda boldy. Bul aýmaq Afınynyń eń kóp baratyn kórikti jerleriniń, sonyń ishinde Akropol men Zevs Olımpııalyq ǵıbadathanasynyń mańynda ornalasqan.
Jarylys saldarynan ǵımarat is júzinde tolyǵymen qırady. Sonymen qatar kórshiles úıler, dúkender men kólikter zaqymdandy. Qurylys qaldyqtary men synǵan áınekter úsh kvartalǵa deıingi qashyqtyqqa shashylǵan.
Aıta keteıik, buǵan deıin ıAkýtııanyń kómir kenishinde jarylys bolǵanyn jazdyq, qaza tapqandar bar.
Al Temirtaýda gaz jarylyp, úı ıesiniń denesin 75% kúıik shaldy.
