«Afınadan Astanaǵa deıin»: Ulttyq mýzeıde halyqaralyq kórme ashyldy
ASTANA. KAZINFORM – Ulttyq mýzeıde «Afınadan Astanaǵa deıin. Vladımır Potanın kollektsııasyndaǵy Olımpıadalyq artefaktiler» atty kórme ashyldy. Ekspozıtsııa «Bolashaq oıyndary – 2026» halyqaralyq mýltısporttyq týrnıri qarsańynda uıymdastyryldy.
Kórmege Vladımır Potanınniń kollektsııasynan alynǵan 140 tarıhı jádiger qoıyldy. Tipti 1896 jylǵy alǵashqy Olımpıada oıyndaryna qatysty eksponattar bar. Ár kezeńge jatatyn marapat, medaldar, dıplomdar men olımpıadalyq alaýlardy tamashalaı alady. Barlyq jádiger túpnusqa kúıinde saqtalǵan.
— Bul kórme «Bolashaq oıyndary – 2026» týrnırine qatysýshylarǵa Olımpıada tarıhymen jaqyn tanysýǵa múmkindik beredi. Ekspozıtsııada qazaqstandyq sportshylardyń keńestik kezeńdegi jáne Táýelsizdik jyldaryndaǵy jetistikteri de qamtylǵan. Mundaı kórmeler jastardyń sportqa qyzyǵýshylyǵyn arttyryp, olımpıadalyq qozǵalystyń tarıhyn nasıhattaýǵa yqpal etedi, - QR Týrızm jáne sport mınıstriniń orynbasary Serik Jarasbaev.
Kórmede Qazaqstan men Reseı sportshylarynyń olımpıadalyq oıyndardyń damýyna qosqan úlesi de kórsetildi.
– Biz ár kórmeni ótkiziletin qalanyń ereksheligine saı daıyndaýǵa tyrysamyz. Bul joly Astananyń sporttyq jetistikteri eskerildi. Qazaqstan sportshylarynyń, ásirese boks pen kúrestegi myqtylyǵy belgili. Sondyqtan ekspozıtsııada osy sport túrlerine arnalǵan arnaıy zaldar uıymdastyryldy. Bul kórme – dostyqtyń, olımpıadalyq birliktiń jáne úlken olımpıadalyq otbasynyń sımvoly. Vladımır Potanınniń olımpıadalyq kollektsııasynyń basty máni de – osy, - dedi Reseı bilim akademııasynyń akademıgi, Máskeý memlekettik ýnıversıtetiniń eńbek sińirgen professory, «Vladımır Potanınniń Olımpıadalyq kollektsııasy» jobasynyń jetekshisi Lev Beloýsov.
Sondaı-aq qazaqstandyq dańqty sportshylarǵa arnaıy bólim ekspozıtsııa jasalǵan. Munda Vladımır Smırnov, Bekzat Sattarhanov, Baqtııar Artaev, Serik Sápıev, Aleksandr Vınokýrov, Denıs Ten, Olga Rypakova, Gennadıı Golovkın jáne Eldos Smetovtiń sporttyq jetistikteri týraly fotosýretter men sport jabdyqtary qoıylǵan.
Ekspozıtsııada kúres kilemi men boks rıngi úlgisindegi arnaıy aımaqtar da jasalǵan. Bul kelýshilerge sport atmosferasyn sezinýge múmkindik berdi.
— Mundaı kórmeler jastardy sportqa qyzyqtyryp, Olımpıada chempıondarynyń jetistigi arqyly jańa býynǵa úlgi bolady. Árbir bala osy jerden «Men de Olımpıada chempıony bolǵym keledi» degen armanmen shyqsa, kórmeniń basty maqsaty oryndaldy dep esepteımin, - dedi álemniń tórt dúrkin chempıony Ilıa Ilın.
Kórmeniń tsıfrlyq bólimi de nazarǵa usynyldy. Neırojelilik tehnologııa arqyly tsıfrlanǵan olımpıadalyq dıplomdar kórsetildi.
Uıymdastyrýshylardyń aıtýynsha, kórme olımpıadalyq qundylyqtardy nasıhattap, sport tarıhyn jańa formatta tanystyrýǵa baǵyttalǵan. Joba ótkenniń jetistikterin saqtap, bolashaq sportshylarǵa úlgi bolýdy kózdeıdi.
— Olımpıadalyq qozǵalystyń basty qundylyqtary – adaldyq, dostyq jáne úzdiksiz damý. Bul kórme sol qundylyqtardy dáriptep, qazaqstandyq chempıondardyń jetistikterin keńinen tanystyrady. Mundaı jobalar jastardyń sportqa qyzyǵýshylyǵyn arttyrady, - dedi Rıo-de-Janeıro Olımpıadasynyń chempıony Dmıtrıı Balandın.
Vladımır Potanınniń Olımpıadalyq kollektsııasy buǵan deıin Máskeý, Sochı, Beıjiń, Mınsk, Qazan jáne Sankt-Peterbýrg qalalarynda kórsetilgen. Astanadaǵy kórme halyqaralyq jobanyń jalǵasy boldy.
Aıta keteıik, kórme QR Ulttyq mýzeıinde 2026 jylǵy 29 shildeden 30 qyrkúıekke deıin ótedi.
Eske sala keteıik, «Bolashaq oıyndary 2026» halyqaralyq týrnırine kıbersporttyń álemdik juldyzdary Astanaǵa kelip jatyr.
