Afınadaǵy alǵashqy meshit qurylysy qolǵa alyndy
ASTANA. 16 qarasha. QazAqparat - Qarasha aıynyń 14-i kúni grek bıligi Afına qalasynda alǵashqy meshittiń qurylysy qolǵa alynǵanyn habarlady, dep jazady muslim.kz.
Grekterdiń astanasynda musylmandardyń qulshylyq úıin turǵyzýǵa qatysty sheshim osydan 13 jyl buryn qabyldanǵan bolatyn. Alaıda, el turǵyndarynyń 95 paıyzyn quraıtyn pravoslavtardyń narazylyǵyna baılanysty bul sheshimdi júzege asyrý múmkin bolmaı kelgen edi. 2011 jyly el úkimeti meshittiń qurylysyna qatysty arnaıy zań qabyldap, osy jazda bıýdjetten 946 myń eýro bóldi. Meshit qurylysynyń kesh qolǵa alynýyna tenderdi utyp alǵan merdiger fırmalardyń artynan bastapqy nıetterinen bas tartqany sebep boldy. Qazirgi ýaqytta meshit qurylysyn júrgizetin merdiger kompanııa tabylyp, musylmandar mereıin ósirdi.
Meshit burynǵy áskerı bólimsheniń ornynda turǵyzylady. Onyń aýmaǵy shamamen 600 sharshy metrdi quraıdy. Tek meshittiń munarasy bolmaıdy.
Afına - birde-bir meshiti joq kári qurlyqtaǵy sanaýly astanalardyń biri. Sońǵy ýaqytta bul eldegi musylmandardyń qatary syrttan kelgen ımmıgranttardyń esebinen artqanyn aıta ketý kerek.
