Afınadaǵy Akropoldi qalyń qar basyp qaldy
AFINA. QazAqparat - Grekııada kún qatty sýytyp ketti. «Medeıa» tsıklonynyń áserinen kóptegen qalany, sonyń ishinde Afına men ejelgi antıka mádenıetiniń áıgili eskertkishi Akropoldi qalyń qar basyp qaldy, dep habarlaıdy QazAqparat BBC agenttigine silteme jasap.
Grekııanyń soltústik-batysyndaǵy Florına qalasynda temperatýra mınýs 19 gradýsqa deıin tómendedi. Qalyń qardyń saldarynan eldegi kólik qozǵalysy toqtap qaldy. Osy sebepti halyqty koronavırýsqa qarsy vaktsınatsııalaýdy ishinara toqtatýǵa týra keldi.
Afınada temperatýra nólge deıin tómendedi, bul Grekııa astanasy úshin erekshe qubylys. Kúnniń kúrt sýytýy saldarynan elde úsh adam óldi. Grekııanyń bosqyn lagerlerine jylytqyshtar, qalyń kórpeler jetkizildi.
Grekııanyń premer-mınıstri Kırıakos Mıtsotakıs jergilikti turǵyndardy úılerinen shyqpaýǵa shaqyrdy. «Energııamen jabdyqtaý jumysyna qatty alańdap otyrmyz. Osy qıynshylyqtan ótý úshin bizge shydamdy bolý qajet. Mundaı jaǵdaı buryn-sońdy bolmaǵan», - dedi ol Úkimettiń shuǵyl otyrysy kezinde.
Ejelgi sáýlet óneriniń Afınadaǵy eń tanymal eskertkishteri qar astynda qaldy.
Meteorologtardyń aıtýynsha, mundaı qar sońǵy ret Afınada 2008 jyly jaýǵan.
Eske sala ketsek, ótken demalys kúnderi Grekııada kún sýytty. Osy aptada jylynady dep boljanǵan.
