Afınada Qazaqstan elshisi «Jańa demokratııa» partııasynyń basshysymen kezdesti
ASTANA. QazAqparat - Afına qalasynda Qazaqstannyń Grekııadaǵy elshisi Alekseı Volkov osy memlekettegi eń iri «Jańa demokratııa» saıası partııasynyń jetekshisi Kırıakos Mıtsotakıspen kezdesti, dep habarlaıdy QazAqparat.
Elshiliktiń baspasóz qyzmetiniń habarlaýynsha, kelissózder barysynda qazaqstandyq dıplomat tanymal grek saıasatkerine Qazaqstannyń táýelsizdik jyldary ishinde qol jetkizgen saıası, áleýmettik-ekonomıkalyq jetistikteri jaıly baıandap bergen.
Sondaı-aq, Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýy aıasynda elimiz qazirgi tańda zamanaýı damý baǵytynda ekeni erekshe atap ótildi. Osy oraıda, elshi eki el arasynda ınvestıtsııalyq jáne týrıstik yntymaqtastyqty damytýǵa zor múmkinshilikterdiń bar bolýyn eskere otyra, ekijaqty saıası, parlamenttik jáne iskerlik baılanystardy damytý qajettigine toqtaldy.
Otandyq dıplomattyń paıymdaýynsha atalǵan baılanystardy damytýǵa Qazaqstandaǵy grek dıasporasy aıtarlyqtaı úles qosa alady.
«Jańa demokratııa» partııasynyń tóraǵasy K.Mıtsotakıs usynylǵan málimetterge alǵys bildire otyra, memleketimizdiń jahan deńgeıinde geosaıası jáne ekonomıkalyq róliniń artyp kele jatqanyn aıryqsha atap, Qazaqstanmen jan-jaqty baılanystardy damytýǵa múddeli ekendigin jetkizdi. Kezdesý qorytyndysy boıynsha K.Mıtsotakıs Qazaqstan óz damýy úshin aldyna qoıǵan bıik maqsattarǵa jetýge, sonymen qatar elimizdiń Ekonomıkalyq yntymaqtastyq jáne damý uıymyna múshe ataný kelissózderinde sáttilik tiledi.
Qazaqstannyń syrtqy ókildigi jýyq arada Grekııanyń basqa da aldynǵy qatarly saıası partııalarymen uqsas konsýltatsııalar ótkizýdi kózdeýde.
Eske sala ketsek, «Jańa demokratııa» - Grekııanyń eń basty iri oppozıtsııalyq partııasy. K.Mıtsotakıs 2016 jyldyń qańtarynda partııa kóshbasy bolyp saılandy.
