Afınada Grekııanyń sońǵy koroli II Konstantın ómirden ótti

ASTANA. QazAqparat – Grekııanyń sońǵy koroli ІІ Konstantın 82 jasynda qaıtys boldy. Bul týraly Grekııanyń ERT memlekettik arnasy málimdedi, dep habarlaıdy QazAqparat Euronews agenttigine silteme jasap.

Korol Pavel men Grekııa korolevasy Frederıkanyń jalǵyz uly marqum korol 1964 jyly taqqa otyrǵan bolatyn.

Ol toǵyz jyl el basqarǵanda eldiń saıası tarıhynda úlken ózgeris boldy, 1967 jyly 21 sáýirde áskerı tóńkeris bolyp, bul áskerı hýntanyń ornaýyna ákep soqty.

Birneshe aı ótken soń Konstantınniń hýntaǵa qarsy tóńkerisi sátsizdikke ushyrap, ol Grekııadan qashýǵa májbúr bolady.

Marqum korol qara polkovnıkter rejımi 1973 jyly taraǵansha Rımde boldy.

Hýnta qulaǵannan keıin de 1974 jyly monarhııa qalpyna kelmedi: Konstantınos Karamanlııa bastaǵan ulttyq birlik úkimeti shaqyrǵan referendýmda grekter ekinshi ret monarhııadan bas tartty.

Osylaısha ІІ Konstantın Grekııanyń sońǵy koroli atandy. Keıinirek Afına ony azamattyǵynan aıyrdy.

2002 jyly Konstantın men onyń otbasy músheleri Grekııadaǵy burynǵy jeke menshigi, naqtyraq aıtqanda Afınadan soltústikke qaraı Tatoı saraıy men Korfý aralyndaǵy vıllaǵa ótemaqy retinde 13,7 mln eýro aldy.

Qazir vılla ǵımaraty mýzeıge aınalǵan.

Afına ortalyǵynda sońǵy ret halyq aldyna shyqqan korol múgedekterge arnalǵan kresloda otyrdy, janynda Ispanııanyń burynǵy korolevasy Sofııa men basqa týystary boldy.

Sozylmaly júrek aýrýy men qozǵalys az bolǵandyqtan Konstantınniń jaǵdaıy nasharlap, ómiriniń keıingi aılarynda birneshe ret aýrýhanaǵa jatqan bolatyn.

Foto: Nils Meilvang / AP Photo