«Afalınanyń sekirisi» fılmi Kıev qalasynda «Altyn Georgıı» syılyǵyn ıelendi
ALMATY. 13 Jeltoqsan. QazAqparat /Názıra Eleýhan/- Sh. Aımanov atyndaǵy «Qazaqfılm» AQ-y men «Medetfılm» stýdııasynyń birlesip túsirgen «Afalınanyń sekirisi» atty fılm quqyq qorǵaý taqyrybyndaǵy fılmder men telebaǵdarlamalardyń H-shy Halyqaralyq kınofestıvalinde Bas júldeni jeńip aldy, dep habarlaıdy «Qazaqfılm» AQ-y baspasóz qyzmeti.
Atalmysh kınofestıval 2010 jyldyń jeltoqsan aıynyń 2-4 aralyǵynda Kıev qalasynda ótken.
«Altyn Georgıı» kınofestıvaliniń qazylar alqasynyń tóraǵasy, Ýkraınanyń Halyq ártisi Grıgorıı Kohan festıvalde fılmdi «zamanaýı ári klassıkalyq keńestik fılmderiniń bir arnaǵa toǵysýy» dep baǵalaǵan.
«Eń úzdik erekshe stsenarıı» atalymy boıynsha Bas júlde men ataýly dıplom «Afalınanyń sekirisi» fılminiń stsenarıı avtory Ádilbek Jaqsybekovke buıyrǵan. Ol «fılmniń basty maqsattarynyń biri - quqyq qorǵaý organdarynyń ımıdjin kóterip, bedelin asqaqtatý boldy»,- dep atap ótti.
Eske sala ketsek, 2010 jyldyń sáýir aıynda «Afalınanyń sekirisi» fılmi Máskeýde ótken detektıvti fılmderiniń DetectiveFest XII Halyqaralyq kınofestıvaliniń («Zań jáne qoǵam») «Úzdik detektıvti kórkem fılm» nomınatsııasynyń Bas júldesine ıe bolǵan edi.
«Altyn Georgıı» Halyqaralyq kınofestıvali - Halyqaralyq polıtsııa qaýymdastyǵynyń ýkraındyq sektsııasynyń jáne Halyqaralyq «Altyn Georgıı» prodıýserlik ortalyǵynyń birlesken jobasy. Baıqaýdyń baǵdarlamalyq baǵyty - qoǵamnyń quqyq qorǵaý mekemelerimen qarym-qatynasy jáne halyq aldynda quqyq qorǵaý mekeme qyzmetkerleriniń jaǵymdy beınesin kıno jáne teleradıohabarlar arqyly qalyptastyrý bolyp tabylady.
