AFAD: Túrkııa atys toqtaǵannan keıin Gazaǵa alǵashqylardyń biri bolyp gýmanıtarlyq kómek jóneltti
ASTANA. KAZINFORM — Atys toqtatylǵannan keıin Gaza sektoryna jetken alǵashqy gýmanıtarlyq kómek kemesi Túrkııaǵa tıesili. Bul týraly Túrkııanyń Tótenshe jaǵdaılar jáne apattar basqarmasyna (AFAD) qarasty Halyqaralyq gýmanıtarlyq kómek departamentiniń basshysy Seıfettın Karabýlýt málimdedi, dep jazdy Anadoly agenttigi.
Karabýlýt AFAD qyzmetkerleri, Túrik Qyzyl Jarty aıy jáne Mysyr Qyzyl Jarty aıy uıymynyń eriktilerimen birge Egıpettiń El-Arısh portynda Gazaǵa baǵyttalǵan 17-shi «Jaqsylyq kemesin» qarsy aldy. Bul kemede shamamen 900 tonna gýmanıtarlyq júk tıelgen.
«Anadoly» agenttigine bergen suhbatynda Karabýlýt buqaralyq aqparat quraldaryna gýmanıtarlyq mıssııalardy jarııalap otyrǵandary úshin alǵys bildirip, 2023 jyldyń 7 qazanynan beri Gazaǵa 102 myń tonna gýmanıtarlyq júk jiberilgenin eske saldy.
AFAD ókiliniń aıtýynsha, bul kómekter 14 áskerı kólik ushaǵy men 17 keme arqyly jetkizilgen. Al sońǵy, 17-shi «Jaqsylyq kemesinde» azyq-túlik pen balalarǵa arnalǵan taǵam bar.
– Atys toqtaǵannan keıin aımaqqa jetken alǵashqy gýmanıtarlyq keme – bizdiń elimizdiki. Biz Gaza halqynyń shuǵyl qajettilikterin óteý úshin jergilikti jerde barlyq daıyndyq jumystaryn aıaqtadyq, – dedi Karabýlýt.
Ol Palestına, Mysyr jáne Túrkııa Qyzyl Jarty aı uıymdary arasynda tyǵyz úılestirý arqyly gýmanıtarlyq kómekti anyqtaý jáne jetkizý jumystary jalǵasyp jatqanyn atap ótti.
– Aldaǵy qys mezgiline deıin ýaqytsha baspana ornatýǵa baǵyttalǵan belsendi jumystar atqarylady, – dedi AFAD ókili.
Karabýlýt Túrkııanyń budan ári de muqtaj jandarǵa gýmanıtarlyq kómek kórsetýdi jalǵastyratynyn aıtty.