AES týraly shtab jumysy aǵartýshylyq sıpatqa ıe boldy – Qoshanov referendým týraly

ASTANA. KAZINFORM – Májilis Spıkeri, «AMANAT» partııasynyń tóraǵasy Erlan Qoshanov AES salý boıynsha ótetin referendýmnyń mańyzy jóninde pikir bildirdi.

«Biz elimiz úshin mańyzdy oqıǵa – atom elektr stantsııasyn salý jónindegi referendým qarsańynda turmyz. Bul Qazaqstan Táýelsizdigi tarıhyndaǵy úshinshi jalpyhalyqtyq referendým. Olardyń ekeýi qazirgi saıası realııada ótýde. Memleket basshysy óz prezıdenttiginiń alǵashqy kúnderinen bastap, halyq úshin eń mańyzdy máseleler boıynsha sheshimder qoǵammen birge qabyldanatynyn aıtyp keledi. Bul jańa saıası mádenıet azamattarymyzdyń úlken qoldaýyna ıe boldy», - dedi E. Qoshanov AMANAT partııasynyń máslıhat depýtattarynyń forýmynda. 

Jetekshi partııalar men qoǵamdyq uıymdar el taǵdyry úshin aldaǵy referendýmnyń mańyzyn túsinip, Halyq shtabyna birikti. 

«Elimizdiń barlyq oblysynda óńirlik shtabtar uıymdastyryldy. Búgin zalda otyrǵan máslıhat depýtattarynyń bári osy jumysqa belsendi qatysýda. Bir aıda aýqymdy úgit-nasıhat naýqany ótkizildi, ol árbir shalǵaı eldi mekenge jetti. Myńdaǵan kezdesýler ótkizildi. Qazaqstandyq jetekshi sarapshylar AES perspektıvalaryn halyqqa túsindirip, túrli qorqynyshtyń negizsiz ekenin jetkizdi. Shtabtyń jumysy shynymen aǵartýshylyq sıpatqa ıe boldy. Eń bastysy, biz – shtab músheleri búkil eldi aralap, halyqtyń naqty qoldaýyn sezindik», - dedi partııa tóraǵasy. 

Aıta keteıik, elordada AMANAT partııasynyń máslıhat depýtattarynyń forýmy bastaldy. Sharaǵa Memleket basshysy Qasym-Jomart Toqaev qatysýda.