AES-tiń naqty jobasy daıyn bolǵanda qoǵamdyq tyńdaý ótkizemiz – Ekologııa mınıstrligi

ASTANA. QazAqparat – Ekologııa jáne tabıǵı resýrstar mınıstrligi Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev Qazaqstanda salynýy múmkin AES-tiń ekologııaǵa yqtımal áseri týraly aıtty, dep habarlaıdy QazAqparat tilshisi.

«Qazaqstan atom elektr stansasy salynsa, ekologııaǵa qandaı áseri bolýy múmkin?», - dep surady jýrnalıst brıfıngide.

Aıdar Abdýalıev Ekologııa jáne tabıǵı resýrstar mınıstrligi AES jobasy naqty daıyn bolǵan kezde qoǵamdyq tyńdaý ótkizetinderin málim etti.

«Atomdyq elektr stansa boıynsha bizdiń mınıstrlikke eshqandaı qujat túsken joq. Túsken jaǵdaıda bul boıynsha qoǵamdyq tyńdaýlar ótkiziledi. Sol qoǵamdyq tyńdaýlarda osy suraqtardy qoıyp, jaýap alýǵa bolady. Bul AES-ti Energetıka mınıstrligi óz quzyretinde qarastyryp otyr. Bizge joba kelgen kezde óz sheshimimizdi beremiz», - dedi komıtet ókili.