AES-ten óndiriletin elektr energııasynyń quny qansha bolmaq

ASTANA. KAZINFORM — Atom energetıkasy jónindegi agenttik AES-ten óndiriletin elektr energııasynyń quny JEO men JES-ten alynatyn elektr energııasyna qaraǵanda joǵary bolatynyn málim etti. 

— Bolashaq atom stansasy óndiretin elektr energııasyna arnalǵan tarıf jobanyń túpkilikti qunyna, paıdalanýǵa arnalǵan operatsııalyq shyǵyndarǵa, tartylǵan zaem qarajatynyń qunyna jáne qarjylandyrýdyń ózge de parametrlerine tikeleı baılanysty bolady. qazirgi Ýaqytta bul baǵyttaǵy esepteýler vedomstvoaralyq deńgeıde jalǵasyp jatyr. Tarıf jumsalǵan shyǵyndy óteý kezeńinde kómirmen jumys isteıtin qoldanystaǵy JEO men JES elektr energııasyna qaraǵanda joǵary bolatyny anyq. Óıtkeni, ol stansalar ondaǵan jyl buryn salyndy jáne olardyń kúrdeli shyǵystary búginde tolyqtaı amortızatsııalandy, — dedi agenttikten BAQ ókilderiniń saýalyna oraı.

Agenttik málimetinshe, jumsalǵan shyǵyndy óteý kezeńi aıaqtalǵannan keıin AES-ten alynatyn elektr energııasynyń quny gaz nemese kómirmen jumys isteıtin stansalardan alynatyn elektr energııasy qunymen teńesedi, tipti odan tómen de bolýy múmkin.

— Atom generatsııasy otyn naryǵyndaǵy qubylmalyqqa táýeldi emes jáne soǵan oraı uzaqmerzimdi baǵa turaqtylyǵyn qamtamasyz etedi. AES qyzmetiniń jobalyq merzimi 60 jyldan asady. Tarıftiń túpkilikti parametri barlyq esepteý aıaqtalyp, kelisim jasalǵannan keıin jarııalanady, — dedi vedomstvodan.

Buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik. 

Sonymen qatar Atom energetıkasy jónindegi agenttik tóraǵasy Almasadam Sátqalıev Qazaqstandaǵy taǵy bir AES-ti qytaılyq vender salatynyn málim etti.