AES-ti frantsýz kompanııasy salýy múmkin be - Almasadam Sátqalıev jaýap berdi

Energetıka mınıstri Almasadam Sátqalıev Aqordada BAQ ókilderine bergen suhbatynda frantsııalyq Electricite de France kompanııasymen Qazaqstanda AES salý máselesi boıynsha kelissóz júrgizýge daıyn ekenin málim etti, dep habarlaıdy Kazinform agenttigi.

«Frantsııa delegatsııasynyń saparyna kelsek, Energetıka mınıstrligi boıynsha birshama aýqymdy máseleni talqylaý kózdelgen. Birinshi másele - Total Energy kompanııasymen qýaty 1 GVt bolatyn jel parkin salý týraly kelisim. Ol parktiń elektr qýatyn saqtaıtyn qurylǵysy da bolady. Buǵan deıin jahandyq jylynýǵa qarsy kúres, atalǵan jobaǵa ınvestıtsııa tartý jóninde úkimetaralyq kelisimge qol qoıylǵan bolatyn. Jalpy Májiliste osy kelisimdi ratıfıkatsııalaý jumysyn bastap kettik», - dedi ol Frantsııa jáne Qazaqstan prezıdentteriniń Aqordadaǵy kezdesýi aldynda.

Sondaı-aq, ol frantsııalyq kompanııanyń Qazaqstanda AES salý múmkindigine toqtaldy.

«Osy sapar aıasynda bizdiń EDF (Electricite de France -red.) kompanııasymen seriktestigimiz talqylanady. Qazir olar General Electric-tiń atom elektr stansalaryna arnalǵan týrbınalar óndirisine baılanysty aktıvterin satyp alý kelisimin aıaqtap jatyr. Kompanııanyń bul salada biregeı tájirıbesi bar. Frantsııada olar 50-den astam reaktordy iske qosqan. Shetelde de salady. Ózderińiz biletindeı, EDF Qazaqstanda AES salýy múmkin kompanııalardyń short-paraǵyna engen. Eger Frantsııa tarapy kelissóz jóninde bastama bildirse, biz ony júrgizýge daıynbyz», - dedi Almasadam Sátqalıev.

Eske salaıyq, Frantsııa Prezıdenti Qazaqstanǵa Memleket basshysy Qasym-Jomart Toqaevtyń shaqyrýymen keldi.

Sapar aıasynda eki el basshylary saýda-ekonomıkalyq, ınvestıtsııalyq jáne energetıkalyq yntymaqtastyqty nyǵaıtý, sondaı-aq halyqaralyq jáne óńirlik kún tártibindegi máselelerdi talqylaıdy dep josparlanǵan.

Aıta ketý kerek, Qazaqstan Prezıdenti Qasym-Jomart Toqaevtyń Frantsııaǵa byltyr jasaǵan resmı sapary aıasynda 35 qujatqa qol qoıylǵan bolatyn.