AES-ti bizdiń ońtústikke salyńyzdar – vıtse-mınıstr belsendiniń ótinishine jaýap berdi

ASTANA. KAZINFORM – Energetıka vıtse-mınıstri Suńǵat Esimhanovqa ortalyq kommýnıkatsııalar qyzmetinde ótip jatqan brıfıngide Atom elektr stansasyn ońtústik óńirge salý týraly usynys aıtyldy.

«Basqalarǵa kerek bolmasa, bizdiń ońtústikke AES qatty kerek. Іrgemizdegi Ózbekstan Jyzaqta salyp jatyr. Túrkistan oblysynda, Kóksaraıdyń boıynda nege salmasqa? Tek Balqash pen Ertistiń boıyna emes, ońtústikke de AES salýǵa bola ma?» - dep surady belsendi Baqytjan Kópbaev.

Mınıstrlik ókili Túrkistan aımaǵyna AES salý usynys oryndy ekenin atap ótti.

«AES-tiń ornyna kelsek, bıyl ǵana bastalǵan jumys emes qoı. Keıingi 10-15 jyldyń ishinde jumys toptary osy baǵytta izdendi – oryndar qarastyrdy. Ózińiz bilesiz, Aqtaý, Kýrchatov qalalary men Úlken kenti usynylǵan bolatyn. Sonyń ishinde Almaty oblysynyń Úlken kentindegi oryn buryn da jan-jaqty zerttelgen. Birinshiden, biz qaı jerde tapshylyq kóp, jeliler qaı jerde damyǵan? Osy sııaqty faktorlardy eskerip otyrmyz. Ózińiz aıtqandaı, ońtústik óńirlerde elektr qýatynyń tapshylyǵy bar. Sondyqtan osy óńirdi tańdap otyrmyz. Biraq alǵashqy stansany salyp bastasaq, keıin qýaty 1200-2400 MVt bolatyn iri reaktor emes, 300-600 MVt bolatyn reaktorlar paıda bolǵan kezde ońtústik, batys óńirlerge de ornatýdy qarastyrýǵa bolady. Biraq onyń bári halyqtyń kelisim arqyly iske asý kerek», - dedi Suńǵat Esimhanov.