AES sekildi qymbat jobaǵa daıynbyz ba, áýeli sony sheship alaıyq - Samuryq-Qazyna basshysy
«AES bola ma, joq pa degen sheshim qabyldaý úshin kóptegen faktorlardy eskerý kerek. Osy sheshimdi qabyldaǵannan keıin qandaı óndirýshimen nemese satýshymen birigip jumys isteıtinimizdi aıta alamyz. Búgingi tańda AES ornalasatyn jerge qatysty másele bar ekenin kórip otyrmyz. Oryn tańdaǵanda sý boıynsha, ekologııa boıynsha birqatar talap qoıylatynyn da túsinýimiz kerek. Qazaqstanda sý taqyryby óte ózekti bolyp otyr, transshekaralyq ózender, Balqash pen Kaspıı tartylyp keledi», - dedi Nurlan Jaqypov baspasóz máslıhatynda.
«Samuryq-Qazyna» basshysy atom elektr stantsııasynyń arzanǵa túspeıtinin, onyń quny ondaǵan mıllıard dollardy quraıtynyn atap ótti.
«Bul atom elektr stantsııasy óz qunyn aqtaý úshin tarıf qandaı bolýy kerek? Biz memleket retinde ondaı tarıfti kótere alamyz ba? Bárimiz jaryq qoldanamyz, uıaly telefondarymyzdy qýattaımyz, ınternetke kiremiz, teledıdar kóremiz. AES ornatsaq, elektr energııasynyń quny qandaı bolady? Barlyq faktorlardy eskerý qajet», - deıdi ol.
N. Jaqypov mundaı qymbat jobaǵa daıynbyz ba, áýeli sony sheshý keregin aıtty.
«Iá, bizde energııa tapshylyǵy bar. Eger AES salsaq, bul tapshylyq jabylady dep boljanǵan, biraq qurylys shamamen 10 jylǵa sozylady, qomaqty qarajat ketedi. Bul elektr energııasyna aqyny kim tóleıdi? Biz, bizdiń balalarymyz... Sondyqtan barlyq turǵyda durys taldaý júrgizý qajet», - dep tolyqtyrdy ol.
«Samuryq-Qazyna» basshysy atap ótkendeı, atom elektr stantsııasyn salý kezindegi talaptardyń biri – jaqsy úlken sý qoımasynyń bolýy.
«Qazir esepterdi oqyp jatyrmyn. Qazirdiń ózinde Kaspıı men Balqash tartylyp jatyr. Eger qazir bireýin tańdap, AES turǵyzsaq, 10 jyldan keıin sý taǵy tartylýy múmkin. Jergilikti sıpattaǵy suraqtar da bar. Kóptegen adamdar AES qasynda turǵysy kelmeıdi», - dep tolyqtyrdy Nurlan Jaqypov.
