AES salýdy qoldaý jónindegi Halyqtyq shtab Túrkistan oblysynyń turǵyndarymen kezdesti
TÚRKІSTAN. KAZINFORM — AES salýdy qoldaý jónindegi Halyqtyq shtab músheleri Túrkistan oblysynyń turǵyndarymen birqatar kezdesý ótkizdi.
Túrkistanda Halyqtyq shtab músheleri óńir aktıvimen júzdesip, oǵan 300-den astam adam qatysty. Májilis Spıkeri, «AMANAT» partııasynyń Tóraǵasy Erlan Qoshanov Shtab AES salý jónindegi respýblıkalyq referendým qarsańynda osy tarıhı oqıǵanyń mańyzy týraly azamattarmen ashyq áńgimelesý úshin óńirge arnaıy kelgenin atap ótti.
Májilis Tóraǵasy túrkistandyqtar el Prezıdenti Qasym-Jomart Toqaevtyń qazaqstandyqtardyń ál-aýqatyn arttyrý jónindegi progressıvti bastamalary men saıasatyn árdaıym qoldap kele jatqanyn jetkizdi.
«Memleket taǵdyryna qatysty kez kelgen mańyzdy sheshim halyqtyń qatysýymen jáne onyń pikirin eskere otyryp qabyldanady. Prezıdentimiz ustanǵan saıasattyń buljymas qaǵıdasy – osy. Bul – bizdiń qoǵamda jańa saıası mádenıet qalyptasqanynyń kórinisi. Biz ár qadamdy nyq basyp, reformalardy kezeń-kezeńimen júzege asyryp kelemiz. Túpki maqsat – ony ár azamat, ár otbasy sezinýge tıis», – dedi ol.
Erlan Qoshanov elektr energııa tapshylyǵy búginde elimizdiń ońtústik óńirlerinde aıryqsha seziletinin atap ótti. Byltyrǵy qorytyndy boıynsha defıtsıt 3,1 mlrd kVt/saǵ qurady. Salystyrý úshin aıta ketsek, ortasha eseppen 100 myń turǵyny bar bir qala 700 mln kVt/saǵ tutynady.
Budan ári Shtab músheleri oblystyq aýrýhanada densaýlyq saqtaý salasynyń qyzmetkerlerimen kezdesip, atom energetıkasyn damytý perspektıvalaryn talqylady.
Osy kúni Halyqtyq shtab músheleri Saýran aýdanyna qarasty Oranǵaı aýylyna bardy. Aýyl turǵyndarymen áńgimelesý barysynda Shtab músheleri jylyjaı salýǵa polıak ınvestorlaryn tartqan Saıram aýdanynyń sharýalary týraly aıtyp, olar kókónis óndirisin tolyq qýatta iske qosa almaǵanyn málimdedi. Buǵan sebep – turǵyn úılerdiń ózine áreń jetip turǵan álsiz qosalqy stantsııa. Shtab músheleri barlyq agrarlyq kásiporyndardy turaqty energııa kózimen qamtamasyz etýdiń mańyzyn atap ótti.
Sonymen qatar, Shtab músheleri Kentaý qalasynda JEO-5 ujymymen kezdesti. 1952 jyly iske qosylǵan bul jylý energetıka toraby 15 myńǵa jýyq adamdy qamtyp otyr. Halyqtyq shtab músheleri barlyq kommýnaldyq kásiporyndardyń úzdiksiz jumys isteýiniń jáne olardy turaqty elektr energııa kózimen qamtamasyz etýdiń mańyzyna toqtaldy.
