AES salýdan qandaı ekonomıkalyq paıda bar

ASTANA. QazAqparat – Ulttyq ekonomıka vıtse-mınıstri Azamat Ámrın AES salýdyń paıdasy jaıly saýalǵa jaýap berdi, dep habarlaıdy QazAqparat tilshisi.

Úkimet otyrysynan keıingi brıfıngte BAQ ókilderi vıtse-mınıstrden AES salýdan qandaı qandaı ekonomıkalyq paıda kútýge bolatynyn suraǵan edi.

«Menińshe, eń aldymen Memleket basshysy aıtqan referendýmdy ótkizip alý qajet. Referendýmǵa oraı qandaı da bir sheshim bolady. Birinshi kezeńde qaýipsizdik mańyzdy dep oılaımyn. Qandaı da bir jańa tehnologııalar kerek. Mindetti túrde Qazaqstan kadrlary bolýy tıis. Osy ólshemsharttardy eskere otyryp qana sheshim qabyldaý qajet shyǵar. Paıdasyna keler bolsaq, qandaı da bir ónim shyǵarý úshin elektr energııasy kerek. Ózderińiz de biletindeı bizde energııa tapshylyǵy boldy. Qazir qandaı da bir artylýy baıqalady. Eger qosymsha energııa bolsa, onda ekonomıkanyń damýyna qosymsha múmkindik týyndaıdy», - dep jaýap berdi Azamat Ámrın.

Sonymen qatar ol AES salýǵa qansha qarajat qajettigine qatysty saýalǵa Qarjy mınıstrligi jaýap beretindigin aıtty.

«Meniń quziretime kirmeıdi, aıta almaımyn. Shyǵys bóligi – Qarjy mınıstrligine. Al referendýmnyń ózin ótkizý bóligine ádette Ortalyq saılaý komıssııasy jaýap beredi», - dedi vıtse-mınıstr.