«AES salýdan bas tartamyz ba?»-respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe Máskeýge jumys saparymen barǵan Qazaqstan Respýblıkasynyń Prezıdenti Nursultan Nazarbaev Reseı Federatsııasynyń Prezıdenti Dmıtrıı Medvedevpen «Gorkı-9» memlekettik rezıdentsııasynda kezdesip, ekijaqty kelissóz júrgizdi. Basylymnyń atap ótýinshe, Qazaqstanda sáýir aıynda prezıdenttik, Reseıde jeltoqsan aıynda Memlekettik Dýmaǵa saılaý bolatynyn aıtqan D.Medvedev: «Árıne, basqa eldiń saılaýyna boljaý aıtý qıyn, biraq biz Sizdiń jolyńyz bolyp, bastaǵan isterimizdi odan ári birlese jalǵastyra berýdi tileımiz. Bizdiń elderimizdiń arasyndaǵy qarym-qatynastar uzaq merzimge shaqtalǵan jáne ol jyl saıyn artyp keledi», - dep atap kórsetken. Maqala «Dostyqtyń dástúrli jalǵasy» degen taqyryppen berilgen.
«Parlament Senatynyń Tóraǵasy Qasym-Jomart Toqaev BUU Bas hatshysynyń Arnaýly Ókili, BUU-nyń Ortalyq Azııadaǵy Aımaqtyq bitimgerlik dıplomatııa ortalyǵynyń basshysy Mıroslav Enchany qabyldady», - dep jazady «Egemen Qazaqstan» gazeti. Kezdesý barysynda Qazaqstannyń BUU jáne onyń qurylymdyq bólimderimen yntymaqtastyǵyn odan ári damytý máseleleri boıynsha pikir almasyldy. Aımaqtyq ortalyqtyń qyzmetin joǵary baǵalaı kelip, tóraǵa Ortalyq BUU júıesindegi tıimdi ınstıtýt bolyp tabylatynyn atap ótti.
***
«Ótken jyly túıini tarqap, núktesi qoıyldy-mys S gepatıtin juqtyrǵan leıkemııamen aýyratyn balalardyń máselesi keshe almatylyq baspasóz ortalyqtarynyń birinde taǵy burq ete kóterildi», - dep jazady «Aıqyn» gazeti. Baspasóz máslıhatyn uıymdastyrǵan «Ulaǵatty januıa» qoǵamdyq qorynyń prezıdenti Marıanna Gýrınanyń aıtýynsha, bir jyl buryn komıssııa jyly jaýyp qoıǵan máseleden keıin analardyń alańy da birshama basylǵan eken. Alaıda ýaqyt óte kele shıkilikter birinen soń biri boı kórsete bastapty. Basylymnyń atap ótýinshe, kóptegen elderde leıkemııamen aýyratyn balalardy emdelip, jazylǵannan keıin esepten 10 jyldan keıin shyǵaratyn bolsa, bizde bul merzim - 5 jyl ǵana. Al gepatıttiń balanyń boıyna 5-7 jyldan soń qaıta soǵýy da múmkin eken. Túıtkildi jaıt «S gepatıtin juqtyrǵan syrqattardyń sany artty» degen taqyryppen berilgen.
Keshe Astanada ótken Qazaqstan energetıkteriniń respýblıkalyq VІІ keńesi elektr energetıkasyn damytýdy halyqtyń ál-aýqatyn nyǵaıtý negizi retinde iske asyrý máselesine arnaldy. Osyǵan oraı «Aıqyn» gazetinde «AES salýdan bas tartamyz ba?» degen taqyryppen maqala basyldy. Basylymnyń atap ótýinshe, Parlament depýtattary, «Nur Otan» HDP, BUU, ıÝSAID damytý baǵdarlamalarynyń, halyqaralyq uıymdardyń, energetıkalyq uıymdar men kompanııalardyń, ǵylymı-zertteý jáne jobalaý ınstıtýttarynyń ókilderi qatysqan sol keńeste energetıka salasynyń bar máselesi talqyǵa tústi. Japonııadaǵy atom elektr stansasynda bolǵan jarylystan keıin Qazaqstanda AES salý qajet pe degen másele de áńgime ózegine aınaldy.
***
Mal sharýashylyǵy salasynda maqsatty baǵdarlanǵan memlekettik saıasattyń júzege asyrylýy, sondaı-aq birqatar salalyq baǵdarlamanyń qabyldanýy nátıjesinde mal sharýashylyǵy ónimderin óndirýde jyl saıyn turaqty ósim baıqalady. Bul týrasynda «Alash aınasy» gazetiniń juma kúngi nómirindegi «Bir jyldan óndirilgen 5 mln sút qaıda?» degen taqyryptaǵy maqalada aıtylǵan. Jarııalanymǵa keshe et jáne sút óndirýshilerdiń elordada ótken ekinshi forýmynda kóterilgen máseleler arqaý bolǵan. Basylymnyń derekterine sáıkes, bir jylda óndirilgen 5 mln 341 myń tonna súttiń 180 myń tonnasyn - aýylsharýashylyq taýar óndirýshi kásiporyndar, 373 myń tonnasyn - sharýa-fermerlik qojalyqtar, 4 mln. tonnadan astamyn jeke úı sharýashylyqtary óndirgen.
«Alash aınasy» gazetiniń turaqty «Dat!» aıdarynda saıası ǵylymdar doktory Gúlmıra Sultanbaevamen aradaǵy suhbat «Derbes ekonomıkalyq qurylym retinde zertteý ýnıversıteti memlekettik bıýdjetten qarjylandyrylýy tıis» degen taqyryppen berilgen. Basylymnyń barlyq saýaldaryna egjeı-tegjeıli jaýap bergen ol: «Bilim men ǵylym - qashanda qoǵamdy órge súırer, eldi órkenıetke aparar aǵysy qatty arna, qýatty kúsh. Ókinishtisi - bizdiń ǵylymymyz, bilimimizdiń qanatyn keńge jaıyp, órge basynda aǵat ketken reformalardyń oryn alǵan jáne olardyń ómirsheńdiginen naýqandyǵy asyp túskeni», - deıdi.
***
«Premer-Mınıstri Kárim Másimov munaıgaz salasy jónindegi vedomstvoaralyq komıssııanyń otyrysyn ótkizip, onda ınvestıtsııalyq jobalardy júzege asyrý máseleleri talqylandy», - dep jazady «Kazahstanskaıa pravda» gazeti. Sondaı-aq basylymnyń atap ótýinshe, sol kúni tús aýa Úkimet basshysy 2011-2015 jyldarǵa arnalǵan Qazaqstan Respýblıkasyndaǵy Sybaılas jemqorlyqqa qarsy kúres jónindegi salalyq baǵdarlamanyń jobasy qaralǵan keńes ótkizdi. Baǵdarlamany talqylaýǵa ortalyq atqarýshy organdar basshylary, «Nur Otan» Halyqtyq-demokratııalyq partııasy janyndaǵy sybaılas jemqorlyqqa qarsy kúres jónindegi respýblıkalyq qoǵamdyq keńestiń tóraǵasy Oralbaı Ábdikárimov, QR Parlamentiniń depýtattary, Memlekettik qyzmet isteri jónindegi agenttiktiń, Bas prokýratýranyń jáne basqalarynyń ókilderi qatysty.
