AES salýda qandaı sheteldik kompanııaǵa basymdyq berilip otyr

ASTANA. QazAqparat – Atom elektr stansasyn salýda qandaı sheteldik kompanııaǵa basymdyq berilip otyr? «Samuryq-Qazyna» AQ strategııa jáne aktıvterdi basqarý jónindegi basqarýshy dırektory Ernat Berdiǵulov QazAqparat tilshisiniń saýalyna jaýap berdi.

«Biz bıyl AES salatyn kompanııany tańdap úlgergen joqpyz. Bul baǵyttaǵy jumys keler jyly da jalǵasady. Bastapqyda 6 kompanııany qarastyrǵan bolatynbyz. Bul Qazaqstandaǵy alǵashqy AES bolmaq. Sondyqtan, ony tolyq zerdelep, barlyq múmkindikti eskerý mańyzdy. Onyń ishinde, osy iske qoldanylatyn tehnologııalardy tańdaý ońaı sharýa emes. Osy oraıda, barlyǵyn eskere kele, AES salýǵa nıetti 4 kompanııany qarastyryp jatyrmyz. Olar – qytaılyq «CNNC», koreıalyq «KHNP», reseılik «Rosatom» jáne frantsııalyq «EDF». Árqaısysynyń ozyq tustary men kemshilikteri bar. Eger obektıvti túrde qarasaq, qazir kóptegen osy salanyń sarapshylary «Rosatomǵa» basymdyq berip otyr. Óıtkeni, álemdegi AES bloktarynyń jartysyn «Rosatom» salyp jatyr. Sonymen qosa, olarda shet memleketterdiń aýmaǵynda AES salý tájirıbesi bar», - dep jaýap berdi Ernat Berdiǵulov tilshi saýalyna oraı.

Eske salaıyq, buǵan deıin Qazaqstanda AES salynsa, ony basqarý qandaı organǵa beriletinin habarlaǵan edik.

Foto: storage.googleapis.com