AES salýda ekologııanyń qandaı talaptary eskerilýi kerek

NUR-SULTAN. QazAqparat – Ekologııa vıtse-mınıstri Zúlfııa Súleımenova AES salýda eskerilýi kerek ekologııalyq talaptar týraly aıtty, dep habarlaıdy QazAqparat tilshisi.

«Kómirmen salystyrǵanda atom energetıkasynyń zııandy shyǵaryndylary az. Tipti, joq dep aıtýǵa bolady. AES salý isinde ekologııa mınıstrliginiń ózindik pozıtsııasy bar. Ony ishteı saraladyq, pysyqtadyq. Elektr stantsııasy qurylysy aldynda iske asyratyn birneshe shara bar. Biz AES salynýy múmkin aýmaqqa strategııalyq jáne ekologııalyq taldaý jasaımyz. Onyń ekojúıege qalaı áser etetinin, sýdyń jetkilikti bolýyn anyqtaýymyz kerek. Ózderińiz bilesizder, Balqash kóliniń arnaıy statýsy bar. Ony da nazarǵa alý mańyzydy», - dedi Zúlfııa Súleımenova.

Aıtýynsha, AES salýda eskerilýi qajet talaptar tizimi energetıka mınıstrligine joldanǵan. Ekologııalyq sharalar qurylys bastalǵan ýaqytqa deıin qabyldanyp bolýy tıis.