AES salynatyn aýmaqta zertteý-izdestirý jumystary 1,5 jyldaı júredi

QONAEV. KAZINFORM — Atom energııasy jónindegi agenttigi tóraǵasynyń orynbasary Áset Mahambetov Úlken aýylynda ótken brıfıngte atom elektr stantsııasyn salýǵa daıyndyq aıasyndaǵy ınjenerlik-izdestirý jumystary 18 aıǵa josparlanǵanyn habarlady.

Onyń aıtýynsha, bolashaq AES ornalasatyn jerde júrgiziletin ınjenerlik-izdestirý jumystary óńirdiń seısmıkalyq belsendiligin qosa alǵanda, barlyq negizgi parametrlerdi anyqtaýǵa baǵyttalǵan.

— Búginde qurylys alańy retinde Almaty oblysynyń Jambyl aýdany belgilendi. Jumys barysynda úsh yqtımal ýchaske tańdalyp, árqaısysynda keshendi ınjenerlik izdestirý júrgiziledi. Alǵashqy kezeńderdiń biri – topyraq burǵylaý jáne úlgilerdi alý bolady, — dep túsindirdi ol.

Onyń aıtýynsha, izdestirý barysynda topyraqtyń sıpattamalary, jerasty sýlarynyń bolýy, seısmıkalyq belsendilik deńgeıi, sondaı-aq belsendi jáne passıvti geologııalyq jaryqtardyń bar-joǵy jan-jaqty zertteledi.

Bul zertteýlerdiń qorytyndysy boıynsha jobalyq-smetalyq qujattamanyń negizin quraıtyn bastapqy derekter jıyntyǵy qalyptasady. Dál osy kezeńde bolashaq AES-tiń negizgi tehnıkalyq parametrleri aıqyndalady. Atom energııasy jónindegi agenttik ókili dalalyq zertteýler keminde 12 aıǵa sozylyp, jyl boıy júrgiziletinin, sodan keıin alynǵan derekterdi taldaý jáne óńdeý kezeńi bastalatynyn atap ótti.

Eske salaıyq, buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik.

Búgin Qazaqstanda alǵashqy AES qurylysy resmı túrde bastaldy.