AES mańyndaǵy turǵyndarǵa ekologııalyq ótemaqy tólene me

QONAEV. KAZINFORM — Almaty oblysy ákimi Marat Sultanǵazıev oblys aýmaǵyndaǵy alǵashqy AES mańyndaǵy jergilikti halyqqa ekologııalyq ótemaqy tóleý týraly suraqtarǵa jaýap berdi. 

Onyń aıtýynsha, Úlken aýylynda shamamen 1700 adam turady. Bul aýyl Balqash kólindegi túbekte ornalasqan.

— Qazirgi ýaqytta ótemaqy nemese qandaı da bir ekologııalyq tólemder máselesi talqylanyp jatqan joq, óıtkeni zııan nemese zııansyz ekeni jóninde naqty qorytyndy joq. Bizdiń túsinýimizshe, Atom energııasy jónindegi agenttik ekologııaǵa da, turǵyndarǵa da zııan keltirmeıtin zamanaýı AES salý týraly kelissóz júrgizip jatyr, — dedi oblys ákimi Ortalyq kommýnıkatsııalar qyzmetinde.

Ákimdik qazir ındýstrııalyq aımaqty abattandyrýmen aınalysyp jatyr. Ondaǵy maqsat — AES-ke qajetti arnaıy bilimi joq jergilikti turǵyndar sol jerde jumys istep, AES úshin taýarlar, jumystar, qyzmetter óndirip, olardy keıin júzege asyra alatyndaı múmkindik jasaý. Sondyqtan arnaıy ındýstrııalyq aımaq qurylady.

— Úlken aýylynyń ekinshi baǵyty — týrızm. Biz bilikti, joǵary jalaqy alatyn kadrlardyń kelýimen birge týrızmniń damýy da óte ózekti bolatynyna senemiz. Ol úshin birneshe týrıstik aımaqtar bar. Sol aımaqtardy damytý jumystaryn júrgizemiz, — dedi Marat Sultanǵazıev.

Buǵan deıin Atom energetıkasy jónindegi agenttik tóraǵasy Almasadam Sátqalıev AES qurylysy qalaı júrip jatqanyn aıtqan edi.

AES qurylysyna alty myńǵa jýyq jumysshy jumyldyrylady.