AES qurylysy boıynsha referendým ótkizý jaýapty qadam bolmaq – Erlan Qoshanov
«Búgin Memleket basshysy Qazaqstan halqyna Joldaýyn jarııalady. Ekonomıkany transformatsııalaý, azamattardyń turmysyn jaqsartý boıynsha aýqymdy mindetter qoıyldy. Biz keshe ǵana óńirlerdi aralap keldik. Sondyqtan halyqty tolǵandyryp otyrǵan máselelerdi jaqsy bilemiz. Ol – ár otbasynyń berekeli ómir súrýi, turaqty jumys, laıyqty jalaqy, balalardyń amandyǵy men qaýipsizdigi. Eń bastysy – elimizdegi tynyshtyq, beıbitshilik pen turaqtylyq. Qasym-Jomart Kemeluly búgin osy jáne jurtshylyqty alańdatqan ózge de máselelerdiń bárine naqty jaýap berdi. Prezıdent azamattarǵa qamqorlyq jasaý, olardyń ál-aýqatyn arttyrý – memlekettiń basty nazarynda ekenin taǵy da aıqyn kórsetti. Máselen, keler jyly 1 qańtardan bastap eń tómengi jalaqy mólsheri 85 myń teńgege deıin kóteriledi. Bul shara 1,8 mıllıon adamdy qamtıdy. Onyń 350 myńy bıýdjet salasynyń qyzmetkereri», - dedi E. Qoshanov.
Sonymen qatar Májilis tóraǵasy turǵyndardyń kredıtti shamadan tys alýy Prezıdentti qatty alańdatyp turǵanyn aıtty.
«Sońǵy kezderi bul áleýmettik shıelenistiń negizgi sebebiniń birine aınalyp keledi. Búginde mıllıonnan astam qazaqstandyq nesıesin tóleı almaı otyr. Memleket basshysy buǵan da naqty jaýap berdi. Osy oraıda azamattardy jappaı qarjylyq saýattylyqqa oqytýdyń aýqymyn keńeıtýdi tapsyrdy. Halyqtyń turmys sapasy ekonomıkalyq ósimge tikeleı qatysty. Al jańa ekonomıkalyq serpilis jasaý úshin memleketimizde múmkindik mol», - dedi ol.
Budan bólek, Memleket basshysy turǵyn úı-kommýnaldyq sharýashylyǵy máselelerine erekshe nazar aýdardy.
«Keıbir óńirlerde «kommýnaldyq kollaps» bolǵanyn bárimiz de kórdik. Turǵyndar jylý, sý, elektr jaryǵynsyz qaldy. Bul – aýqymdy máseleler jáne de úlken ári uzaq merzimdi ınvestıtsııany qajet etedi. Osy oraıda Joldaýda ınfraqurylymdy keshendi túrde jańǵyrtý mindeti júkteldi. Sý máselesi de elimiz úshin asa ózekti. Ásirese, sýdyń sapasy men halyqqa qoljetimdiligine qatysty óńirlerde másele kóp. Ony keshe oblystardy aralaý kezinde ózderińiz de kórdińizder. Osy oraıda sýǵa qatysty máselelerdi tolyq sheshý úshin Sý resýrstary jáne ırrıgatsııa mınıstrligi qurylady. Taǵy bir mańyzdy másele – kólik-logıstıka. Bul sala ekonomıkanyń kúretamyryna aınalyp keledi. Búgin Joldaýda teńiz, jol ınfraqurylymyn damytý, kólik áleýetin arttyrý boıynsha biraz mindet júkteldi. Ol úshin Kólik mınıstrligi qaıta qurylyp, osy jumyspen tikeleı analysatyn bolady», - dedi Erlan Qoshanov.
Onyń paıymynsha, atom elektr stantsııanyń qurylysy boıynsha referendým ótkizý jaýapty ári mańyzdy qadam bolmaq.
«Jalpy, búgin Prezıdent osy sessııaǵa arnalǵan zań shyǵarý jumysynyń basym baǵyttaryn aıqyndap berdi. Biz jańa Salyq jáne Bıýdjet kodeksterin qabyldaımyz. Olar kásipkerliktiń damýyn yntalandyryp, bıznes-protsesterdiń bárin túsinikti jáne ashyq etýi kerek. Sonymen qatar tsıfrlandyrýdy jetildirýge, ǵylym men tehnologııany damytýǵa zańnamalyq turǵydan tyń serpin berý qajet. Budan bólek, monopolııaǵa qarsy kúrestiń tıimdiligin arttý úshin qoldanystaǵy zańǵa da ózgerister engizemiz. Áriptester, bizdiń maqsatymyz – Joldaýda aıtylǵan mindetterdiń zańnamalyq deńgeıde sapaly ári jedel oryndalýyn qamtamasyz etý. Respýblıkalyq bıýdjetten bólingen árbir tıyn múltiksiz óz maqsatyna jumsalýǵa tıis. Depýtattar muny qatań qadaǵalaýy qajet», - dedi Májilis tóraǵasy.
