AES qurylysynyń barysyn baqylaý úshin MAGATE ókilderi Ózbekstanǵa bardy
TAShKENT. KAZINFORM — Salynyp jatqan AES jobasynyń qurylysyn baqylaý maqsatynda Ózbekstanǵa MAGATE mıssııasy keldi, dep habarlaıdy Kazinform agenttiginiń Tashkenttegi menshikti tilshisi.
Qazirgi ýaqytta Uzatom agettininiń ǵımaratynda MAGATE qyzmetkerlerimen kezdesý ótip jatyr. Onda alǵash bolyp sóz alǵan Atom energııasy jónindegi agenttiktiń dırektory Azım Ahmedhadjaev jaýapty vedomstvo jáne ozge de organdar óz áleýetin nyǵaıtyp kele jatqanyn atap ótti.
— Kadr daıarlaý Máskeý ınjenerlik-fızıkalyq ınstıtýtynyń Tashkent fılıalynda jalǵasyp jatyr. Qazirgi ýaqytta onda ıadrolyq energetıka, ıadrolyq tehnologııalar, jylý jáne elektr energetıkasy baǵyty boıynsha 250 stýdent bilim alyp jatyr. Budan bólek, 2026 jyldan bastap ıadrolyq fızıka jáne tehnologııalar boıynsha magıstrlik baǵdarlama iske qosylady. 2023–2025 jyldar aralyǵynda fılıal 160 maman daıarlap shyǵardy. Bıyl taǵy 74 túlek oqýyn támamdaıdy, — dedi Azım Ahmedhadjaev.
Ol sondaı-aq, AES jobasynyń ekologııaǵa áserin baǵalaý jáne jurtshylyqpen jumys júrgizýge erekshe nazar aýdarylyp jatqanyn atap ótti. Byltyr 23 jeltoqsanda Jızaq oblysyna qarasty Farısh aýdanynyń Bogdan kentinde qoǵamdyq tyńdaý ótti.
— Qatysýshylarǵa joba jan-jaqty tanystyryldy. Sonymen qatar ıadrolyq otyn men radıoaktıvti qaldyqtardy paıdalaný, olardy zalalsyzdandyrý tásilderi týraly aqparat berildi. Qoǵamdyq tyńdaý nátıjesinde AES-ti salý jobasy turǵyndar tarapynan qoldaýǵa ıe boldy, — dep jumystardyń nátıjesin baıandady Azım Ahmedhadjaev.
Osy rette Uzatom basshysy MAGATE mıssııasynyń Ózbekstanǵa sapary jobanyń kelesi kezeńge ótýine jáne ulttyq ıadrolyq ınfraqurylymdy damytýdyń basymdyqtaryn aıqyndaýǵa baǵyttalǵan mańyzdy qadam retinde baǵalady.
Óz kezeginde MAGATE ókili Djon Haddad bul — mıssııanyń ekinshi kezeńi ekenine toqtaldy. Uıym mamandary alǵash ret Ózbekstanǵa 2021 jyly kelip, respýblıkanyń AES qurylysyna daıyndyq barysyn baqylaǵan edi.
— MAGATE qyzmetkerleri men halyqaralyq sarapshylardan quralǵan bizdiń top seriktesterimizben syndarly dıalog júrgizip, qujattardy zerdelemek. Keıin túrli baǵyttar boıynsha talqylaý ótkizemiz. Osy mıssııaǵa daıyndyq aıasynda atqarylǵan aýqymdy jumys úshin Uzatom agenttiginiń ujymyna jáne basqa da memlekettik organdaryna alǵysymdy bildiremin. Bul mıssııany tek tehnıkalyq sholý emes, sonymen qatar ózara tájirıbe almasý men yntymaqtastyqqa arnalǵan alań dep sanaımyn, — dedi Djon Haddad.
Eske salaıyq, taıaýda Ózbekstanda AES qurylysy resmı túrde bastaldy.
Buǵan deıin habarlaǵanymyzdaı, Ózbekstanda salynatyn AES-tiń quny 9,5 mlrd dollardan aspaıdy.
Qosa ketsek, Ózbekstanda salynatyn AES eldiń úsh óńirin elektr qýatymen qamtamasyz etedi.
