AES qurylysynda Qazaqstan halqy ózi tańdaý jasaıdy – Máýlen Áshimbaev

ASTANA. KAZINFORM – Senat tóraǵasy Máýlen Áshimbaev elimizde AES salý referendýmyna qatysty pikir aıtty.

«Ekonomıkamyzdy damytýdaǵy qazirgi problemalardyń biri elektr energııasynyń tapshylyǵyna baılanysty. Ekonomıkamyzdy eki ese ulǵaıtamyz degen josparymyz bar. Úkimet biraz óndiristi ashý jumystaryn atqaryp jatyr. Sondyqtan elektr energııasynyń budan da kóbirek kólemi kerek ekeni anyq. Eger energııa kózi bolmasa, onda bul jaǵdaı úlken problemaǵa alyp keledi. Sol sebepti tsıfrlyq tehnnologııalardy, jasandy ıntellekti, óndiristi damytýǵa qosymsha energııa kerek. Bul máseleni turaqty túrde sheshýdiń birden bir joly – Qazaqstanda atom elektr stantsııasyn salý. Osyǵan baılanysty Prezıdent Qasym-Jomart Kemeluly Toqaev kúzde referendým bolatyny týraly aıtty», - dedi M. Áshimbaev Senatta tilshiler suraǵyna jaýap bere otyryp.

Onyń aıtýynsha, bul baǵytta naqty sheshimdi halyq qabyldaıdy.

«AES kerek pe nemese kerek emes pe? Sheshimdi halyq jasaıdy. Biz bılik tarapynan usynys aıtqanymyzben, ary qaraı Qazaqstan halqy ózi tańdaý jasaıdy. Jalpy, osy máselege qatysty tıisti aqparat taratylyp, osy bastamanyń mán-jaıy túsindiriletini anyq. Referendýmǵa oraı túrli áleýmettik toptar, sarapshylar ózderiniń pikirlerin aıta jatar. Halyq osy aqparatty qorytyp, sheshim qabyldaıdy. Qazaqstandyqtar bul refrendýmda ózderiniń ustanymyn naqty kórsetedi dep senemiz», - dedi Senat tóraǵasy.

Budan buryn habarlanǵandaı, Prezıdent Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde elde atom elektr stansasyn salý jobasy týraly pikir bildirdi. 

Atap aıtqanda, AES jónindegi referendým kúzde ótedi.