AES qurylysyna otandyq armatýra jetkiziledi: Qarmet jańa ónim óndirisin ıgerdi
TEMІRTAÝ. KAZINFORM — Qazaqstanda atom elektr stantsııasyn salý jobalaryna daıyndyq júrip jatqan kezeńde strategııalyq mańyzy bar nysandardy otandyq materıaldarmen qamtamasyz etý máselesi erekshe ózektilikke ıe bolyp otyr.
Memleket aldynda turǵan basty mindetterdiń biri — qaýipsizdik pen senimdiliktiń eń joǵary talaptaryna saı keletin ónerkásiptik bazany qalyptastyrý.
Osy baǵyttaǵy mańyzdy qadamdardyń birin Qarmet kompanııasy jasady. Kásiporyn dıametri 8-den 40 mıllımetrge deıingi A500SEÝ klasty armatýralyq prokat óndirisin ıgerdi. Ónim erikti sertıfıkattaýdan sátti ótip, strategııalyq mańyzy bar ınjenerlik qurylystardy salýda qoldanýǵa múmkindik aldy.
Kompanııa mamandarynyń aıtýynsha, jańa ónimdi ıgerý memlekettik tapsyrysty oryndaý aıasynda júzege asyrylǵan.
— Bizdiń aldymyzǵa GOST 34028-2016 talaptaryna sáıkes A500SEÝ klasty armatýralyq prokat óndirisin ıgerý mindeti qoıyldy. Buǵan deıin kombınat A500S klasty sertıfıkattalǵan armatýra shyǵarǵan bolatyn. Jańa ónimniń basty ereksheligi — joǵary ıilimdiligi, seısmıkalyq tózimdi konstrýktsııalarǵa jaramdylyǵy jáne 2 mıllıonnan astam ret qaıtalanatyn tsıkldik júktemelerge tótep berý qabileti. Osy sıpattamalarynyń arqasynda atalǵan armatýra atom energetıkasy nysandaryn jáne basqa da kúrdeli ınjenerlik qurylystardy qosa alǵanda, asa jaýapty obektilerdiń qurylysynda qoldanylýy múmkin, — dep atap ótti Qarmet kompanııasynyń sapany baqylaý bóliminiń mamandary.
Qazirgi tańda Qarmet armatýrasy turǵyn úı, óndiristik jáne ınfraqurylymdyq nysandar qurylysynda keńinen qoldanylyp keledi. Jańa ónimdi shyǵarý úshin kompanııa mamandary tolyq tehnologııalyq tsıkldi ázirlep, tájirıbelik jumystar júrgizdi. Joba aıasynda bolat ottekti-konverter tsehynda balqytylyp, keıin sortty prokat tsehynda daıyn ónim shyǵaryldy.
Dıametri 8-den 40 mıllımetrge deıingi tájirıbelik armatýra partııalary barlyq qajetti attestatsııadan ótip, erikti sertıfıkattaýǵa jiberilgen. Synaq nátıjeleri boıynsha kompanııa 2026 jylǵy 4 maýsymda halyqaralyq zańdy kúshi bar sáıkestik sertıfıkatyn aldy.
Mamandardyń pikirinshe, mundaı ónim óndirisin ulǵaıtýda Qarmet kompanııasy salyp jatqan jańa sortty prokat stany mańyzdy ról atqarady. Jylyna 540 myń tonna sortty prokat shyǵarýǵa qaýqarly óndiristik keshenniń qurylysy bıyl aıaqtalady dep josparlanǵan.
Dál osy alańda A1000 klasyna deıingi zamanaýı armatýranyń keń assortımentin ónerkásiptik kólemde shyǵarý jolǵa qoıylady. Jańa óndiristik keshen ónim túrlerin kóbeıtip qana qoımaı, olardyń sapalyq sıpattamalaryn da jaqsartýǵa múmkindik beredi.
Jobany iske asyrý nátıjesinde kompanııanyń sortty prokat naryǵyndaǵy pozıtsııasy nyǵaıyp, ımportty almastyrý múmkindikteri artady. Sonymen qatar Qazaqstanda kúrdeli ári jaýapkershiligi joǵary ınfraqurylymdyq nysandar qurylysyna qajetti metall ónimderin óndiretin tolyqqandy otandyq óndiristik baza qalyptasady. Bul óz kezeginde atom energetıkasy sekildi strategııalyq salalardy damytýǵa qosymsha serpin beredi.
