AES qurylysyna naqty bir eldiń tehnologııasyn tańdaý sheshimi jasalmady — mınıstrlik
ASTANA. KAZINFORM — AES qurylysyna qatysty naqty bir eldiń tehnologııasyna tańdaý jasalǵan joq. Bul jumystar referendým nátıjesine qaraı iske asyrylady. Bul týraly QR Energetıka vıtse-mınıstri Suńǵat Esimhanov málim etti.
«Ázirge, AES qurylysyna qatysty referendým ótetin merzim belgisiz. Jalpy, zertteýler aıasynda da damyǵan elderdiń tehnologııalary qarastyrlatyny túsinikti. Atap aıtqanda, referendým ótkennen keıin, ıaǵnı tıisti daýys nátıjesinen soń naqty bir eldiń tehnologııasyn irikteýge nazar aýdarylady», - dedi S. Esimhanov Senattyń jalpy otyrysynan keıin tilshiler suraǵyna jaýap bere otyryp.
Aıta keteıik, osyǵan deıin 4 eldiń ıadrolyq tehnologııasy zerttelgen edi.
Vıtse-mınıstrdiń aıtýynsha, dál qazir mınıstrlik naqty bir eldiń tehnologııasyn tańdaýǵa qatysty sheshim jasamaǵan.
«Bul sheshim (referendýmnan keıin) komıssııa aıasynda mamandardy tartý arqyly qabyldanady. Qazir 4 memlekettiń tehnologııasy qarastyrylyp jatyr. Olardyń árqaısynyń ózindik ereksheligi bar. Sonymen qatar, biz de ózimizdiń talaptarymyzdy qoıamyz. Kelissózder barysynda tıimdi tehnologııaǵa nazar aýdarylady», - dedi Suńǵat Esimhanov.
Sonymen qatar tilshiler mınıstrlik halyqty aqparattandyrý jumystaryn júrgizý úshin óńirlerdi aralaýdy qashan aıaqtaıtynyn surady.
«Biz óz jumysymyzdy jalǵastyryp jatyrmyz. Aldyn ala boljam boıynsha kúzde aıaqtaımyz dep otyrmyz. Bizde de jumys aýqymy úlken. Sondyqtan kúzde bizdiń josparly jumys aıaqtalady dep oılaımyn», - dedi vıtse-mınıstr.
Budan bólek ol «halyq AES qurylysyna qatysty qandaı pikirde?» degen suraqqa jaýap berdi.
«Ony «Samruq-Qazynadaǵy» aınalysatyn mekemeler bar, tıisti áleýmettik zertteýler bar. Jalpy, sońǵy zertteýlerde halyqtyń 55-57 paıyzy qoldaıdy degen. Ol jaýap respondenttik saýalnama deńgeıinde alyndy. Sondyqtan ári qaraı bul jumysty jalǵastyrý kerek. Qoldaıtyny bar, qoldamaıtyny bar. Ekologııa jaǵynan da, tazalyq jaǵynan da, energetıkalyq qaýipsizdik jaǵynan da tıisti aqparattardy alǵa tartyp, osyny áriptesterimiz túsindirip jatyr», - dedi S. Esimhanov.
Budan buryn habarlanǵandaı, Ońtústik Koreıa Qazaqstanǵa APR-1400 reaktorymen jumys isteıtin AES salýdy usynbaq.
Energetıka mınıstri Almasadam Sátqalıev referendým kezinde AES qurylysyna qarsy sheshim qabyldansa, bul jumystyń bári toqtaıtynyn aıtqan edi.
«Degenmen, biz osy sheshimdi el halqy qoldaıdy dep senemiz. Óıtkeni atom energııasynyń mańyzdylyǵyn túsinemiz. Atom energetıkasy ónerkásip pen el ekonomıkasynyń damýyna eleýli yqpal etedi. Qazaqstanda ýran ónimderin óndirý salasynda barlyq qajet múmkindik bar. Sondyqtan AES qurylysy ekonomıka men ǵylymdy damytý úshin orasan zor áleýetti kóteretin sońǵy tsıkl sanalady», - dedi mınıstr.
