AES qurylysyna qajet mamandar endi «Bolashaq» arqyly daıarlanady
ASTANA. KAZINFORM - 22 mamyrda QR Atom energııasy jónindegi agenttigi «Qazaqstandyq atom elektr stantsııalary» JShS-men jáne «Halyqaralyq baǵdarlamalar ortalyǵy» AQ-men birlesip, atom salasynyń mamandary úshin «Bolashaq» halyqaralyq stıpendııasynyń jańa múmkindikterine arnalǵan kezdesý ótkizdi.
QR Atom energııasy jónindegi agenttiktiń baspasóz qyzmetiniń habarlaýynsha, baǵdarlamanyń jańartylǵan qaǵıdalary sheńberinde alǵash ret atom salasynyń qyzmetkerleri úshin jeke sanat engizildi. Bul jańashyldyq atom salasyndaǵy strategııalyq jobalardy iske asyrý, onyń ishinde atom ınfraqurylymyn damytý jáne Qazaqstanda AES salý úshin ınjenerlik, ǵylymı jáne tehnıkalyq kadrlardy daıarlaýǵa baǵyttalǵan.
Kezdesýge sondaı-aq QR Ulttyq ıadrolyq ortalyǵynyń, ıAdrolyq fızıka ınstıtýtynyń, Qazatomónerkásip UAK-nyń ókilderi qatysty.
Halyqaralyq baǵdarlamalar ortalyǵynyń ókilderi qatysýshylarǵa konkýrstyq irikteý tártibin, kandıdattarǵa qoıylatyn talaptardy, «Bolashaq» jáne «Ǵylymı taǵylymdamalar» baǵdarlamasyna qatysý sharttaryn, sondaı-aq qajetti qujattar tizbesi men stıpendııa taǵaıyndaý kezeńderin túsindirdi.
Sheteldik joǵary oqý oryndaryn tańdaý, tildik daıyndyq jáne stıpendıattardyń oqýdy aıaqtaǵannan keıingi odan ári kásibı qyzmeti máselelerine jeke nazar aýdaryldy.
-Atom salasy úshin «Bolashaq» mamandandyrylǵan sanatyn qurý ıadrolyq energetıka salasynda kadrlarǵa suranystyń artýy jaǵdaıynda qajet bolatyn joǵary bilikti mamandardy daıarlaýdy kúsheıtýge múmkindik beredi,-delingen habarlamada.
Osyǵan deıin Qazaqstan atom energetıkasyn damytý úshin qandaı tehnologııa qoldanatyny týraly jazdyq.
