AES qurylysyna qatysty tıisti konsýltatsııalar bastaldy - Almasadam Sátqalıev

ASTANA. KAZIFORM – QR Energetıka mınıstri Almasadam Sátqalıev AES qurylysyna qatysty túsinik berdi

«Arnaıy úkimettik komıssııa qurylady. Bul komıssııa konkýrstyq protseske qatysatyndarmen ashyq konkýrstyq dıalogty bastaıdy. Qazir aldyn ala konsýltatsııalar bastalyp ta ketti. QHR men Ońtústik Koreıada kezdesýler boldy. Biz áleýetti vendorlarǵa tıisti talaptardy aıtyp jatyrmyz. Osy oraıda elektr energııasy men qurylystyń ózindik quny, sondaı-aq nysannyń qurylysyn ýaqytyly aıaqtaý kepildigi sııaqty máseleler eskerilgen. Sonymen qatar, qaýipsizdik máseleleri, búkil áleýmettik paket, qarjylandyrýmen qamtamasyz etý baǵytynda da jumystar atqarylyp jatyr», - dedi A. Sátqalıev.

Onyń aıtýynsha, bul dıalog aıasynda úkimettik komıssııa tıisti usynystardy daıarlaıdy. Keıinnen osy uysynystar QR Prezıdenti janyndaǵy Energetıkalyq keńeste qaraý úshin Úkimet basshylyǵy aldynda tanystyrylady.

«Qarjy-ekonomıkalyq blok boıynsha, quqyqtyq máseleler boıynsha keńesshilerdi tartý josparlanǵan. Munymen qosa, tehnıkalyq keńesshi bolady», - dedi mınıstr.

Aıta keteıik, Ortalyq referendým komıssııasy 6 qazanda ótken respýblıkalyq referendýmnyń túpkilikti qorytyndysyn jarııalady. 

Oǵan sáıkes, daýys berýge qatysqan azamattardyń 71,12 paıyzy nemese 5 561 937 adam Qazaqstanda atom elektr stansasyn salý máselesin qoldady. Al qarsy daýys bergender sany – 2 045 271 adam.