AES qurylysyna qatysty referendýmǵa 30 elden baıqaýshy keledi

ASTANA. KAZINFORM – AES qurylysyna qatysty referendýmdy 30 eldiń baıqaýshysy qadaǵalaıdy. Bul týraly Ortalyq referendým komıssııasynyń hatshysy Muhtar Erman aıtty. 

«Bıyl 3 qyrkúıekte qabyldanǵan qaýly negizinde akkredıtatsııa 2024 jylǵy 30 qyrkúıekte, Astana ýaqyty boıynsha saǵat 18.00-de aıaqtaldy. Osylaısha, barlyǵy 177 baıqaýshy resmı tirkeýden ótti. 30 shet memleketten jáne 4 halyqaralyq uıymnyń ókilderi bar. Syrtqy ister mınıstrligi baıqaýǵa 5 iri halyqaralyq uıymǵa, onyń ishinde Eýropadaǵy qaýipsizdik jáne yntymaqtastyq uıymy Demokratııalyq ınstıtýttar jáne adam quqyǵy jónindegi bıýrosyna, Táýelsiz memleketter dostastyǵyna, Shanhaı yntymaqtastyq uıymyna, Túrki memleketteriniń uıymyna jáne Azııadaǵy ózara is-qımyl jáne senim sharalary jónindegi keńeske shaqyrý joldady», - dedi ol komıssııa otyrysynda. 

Onyń atap ótýinshe, EQYU tarapynan baıqaýshy bolmaıdy. Óıtkeni, uıymnyń aldaǵy aılarǵa josparlanǵan saılaýlarǵa baılanysty is-sharalary kóp. Sondyqtan elimizge mıssııa jibere almaıdy. 

«Qazirgi tańda baıqaýǵa qatysatyn halyqaralyq uıymdardyń qatarynda TMD, ShYU, Túrki memleketteriniń uıymy, Azııadaǵy ózara is-qımyl jáne senim sharalary jónindegi keńes bar. Jalpy respýblıkalyq referendýmǵa 30 shet memlekettiń ókilderi qatysady. Olardyń ishinde erekshe atap ótetin, 4 ortalyq saılaý organynyń tóraǵalary keledi. Olar: Ázerbaıjan Ortalyq saılaý komıssııasynyń tóraǵasy Mazaır Panahov, Belarýs Ortalyq saılaý komıssııasynyń tóraǵasy Igor Karpenko, Tájikstan Ortalyq saılaý jáne referendým komıssııasynyń tóraǵasy Bahtıer Hýdoerzoda, Ózbekstan Ortalyq saılaý komıssııasynyń tóraǵasy Zıınıddın Nızamhodjaev», - dedi Muhtar Erman.