AES qurylysyna alty myńǵa jýyq jumysshy jumyldyrylady

MÁSKEÝ. KAZINFORM - Oral qalasynda ótip jatqan XXI Qazaqstan – Reseı óńiraralyq forýmynyń plenarlyq sessııasyna beınebaılanys arqyly qatysyp jatqan Qazaqstan Prezıdenti Qasym-Jomart Toqaev atom elektr stansasy qurylysyna qatysty máselelerge toqtaldy, dep habarlaıdy Aqordanyń baspasóz qyzmeti.

Prezıdent sózinde atom salasyndaǵy kadr áleýetin kúsheıtý Qazaqstan úshin asa mańyzdy sıpatqa ıe ekenin atap ótti.

«Qazaqstan «Rosatom» bastaǵan halyqaralyq konsortsıýmnyń qatysýymen birinshi atom elektr stansasynyń qurylysyna kiristi. Tehnologııalyq ári ǵylymı turǵydan kúrdeli bul jobany tabysty júzege asyrý joǵary sanatty kásibı mamandarǵa tikeleı baılanysty. AES qurylysyna alty myńǵa jýyq jumysshy jáne úsh myńnan astam orta býyn mamany jumyldyrylady. Sonymen qatar beıindi mamandarǵa suranys joǵary bolatyny sózsiz. Sondyqtan atom salasyndaǵy kadr áleýetin kúsheıtý Qazaqstan úshin asa mańyzdy sıpatqa ıe,-dedi QR Prezıdenti.

Bul rette Memleket basshysy atalǵan máseleni sheshýde Qazaqstan reseılik joǵary oqý oryndarymen yntymaqtastyqqa erekshe mán beretinin atap ótti.

 -Ál-Farabı atyndaǵy QazUÝ janynan «MIFI» Ulttyq ıadrolyq zertteý ýnıversıteti fılıalynyń ashylýy – sonyń aıqyn dáleli,-dedi ol.

Osyǵan deıin Memleket basshysy Qazaqstan men Reseı saýda jáne ınvestıtsııa kólemin ulǵaıta berýge tıis ekenin aıtty.