AES qurylysyna 15 mlrd dollarǵa deıin jumsalýy múmkin – Tımýr Jantıkın

«Qazaqstandyq atom elektr stantsııalary» JShS bas dırektory Tımýr Jantıkın elimizde AES salýǵa qansha qarajat jumsalýy múmkin ekenin aıtty, dep habarlaıdy Kazinform. 

«AES jobasyna qujattar shamamen 5 jyl ázirlenedi. Óıtkeni, birinshi kezeńde tehnıkalyq-ekonomıkalyq negizdemeni ázirleýge 1,5-2 jyl kerek. Sodan keıin Úkimet AES salý týraly oń sheshim qabyldasa, jobalaý-smetalyq qujattama ázirlenedi. Oǵan da ýaqyt kerek. AES shashamen 5 jylda salynady, ıaǵnı atom elektr stantsııasyn 2035 jyly iske qosamyz dep oılaımyz», - dedi T. Jantıkın elordada «Beıbit atom» taqyrybynda ótken respýblıkalyq semınarda. 

Onyń sózine qaraǵanda, elimizdiń elektr energetıkasyn damytý baǵdarlamasy men qajet atom blogy sanyna qatysty tujyrymdama ázirleý kerek. Osyny negizge alyp, Qazaqstannyń elektr energetıkasyn damytý baǵdarlamasy daıyndalady. 

«Birinshi stantsııa 10-15 mlrd dollar bolýy múmkin. Sebebi, ol – alǵashqy stantsııa. Qazir qarjylandyrý kózi pysyqtalyp jatyr. Bul – negizinen halyqaralyq qarjy ınstıtýttary. Joba ázirge kommertsııalyq tártipte qaralyp jatyr, ıaǵnı memleket oǵan aralaspaıdy. Sondyqtan onda tıisti sharttar eskerilgen», - dedi Tımýr Jantıkın.

Bıyl jazda Energetıka mınıstrligi eki energııa blogynan turatyn stantsııa salýǵa shamamen 12 mlrd AQSh dollary kerek ekenin málimdegen edi.