AES qurylysyn kútpeı, jańa qýattardy iske qosý kerek – Prezıdent

QYZYLORDA. KAZINFORM – Eldiń birneshe aımaǵynda derekterdi óńdeý ortalyqtaryna arnalǵan alqaptar salynady. Bul týraly Prezıdent Qasym-Jomart Toqaev V Ulttyq quryltaıda málim etti.

- Barlyq IT-ınfraqurylym senimdi jáne úzdiksiz jumys isteýge qajetti qýatty derekter ortalyqtaryn salý úshin aldyn ala arnaıy aımaqtardy anyqtaý qajet. Bólingen alańdarda elektrmen jabdyqtaý, salqyndatý jáne qaýipsizdik júıeleri bar derekterdi óńdeý ortalyqtaryn salý qajet. Úkimet Pavlodar oblysynyń ákimdigimen birlesip Ekibastuz basseıniniń energetıkalyq bazasynda derekterdi óńdeý ortalyǵyna arnalǵan alqap salýdy josparlap otyr. Jaqsy usynys, onyń qanshalyqty sátti júzege asyrylatynyn kóreıik, - dedi Qasym-Jomart Toqaev.

Memleket basshysy atalǵan derekter ortalyqtary metallýrgııalyq kombınattarmen birdeı qýat tutynatynyn eske saldy.

- Biz atom elektr stantsııalary qurylysynyń aıaqtalýyn kútpeı, jańa energetıkalyq qýattardy iske qosýmen aınalysýymyz kerek. Ózin-ózi energetıkalyq qamtamasyz etý máselesi memlekettik saıasattyń mańyzdy bóligi retinde qarastyrylýy kerek, - dedi Prezıdent.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.