AES qurylysy tolyq ıadrolyq otyn tsıklin qalyptastyrýǵa múmkindik beredi — Toqaev

ASTANA. KAZINFORM — AES qurylysy tolyq ıadrolyq otyn tsıklin qalyptastyrýǵa múmkindik beredi. Bul jaıynda «Rossııskaıa gazeta» basylymynda jaryq kórgen Memleket basshysy Qasym-Jomart Toqaevtyń «Máńgilik dostyq — halyqtarymyzǵa jol silter temirqazyq» degen taqyryppen berilgen avtorlyq maqalasynda aıtylǵan.

— Qazaqstan men Reseıdiń ónerkásiptik kooperatsııasynyń irgetasyn jalpy ınvestıtsııa kólemi 50 mlrd AQSh dollarynan asatyn 170-ten astam birlesken joba quraıdy. «Sıbýr», «Gazprom», «Lýkoıl», «EvroHım» sııaqty birqatar iri reseılik kompanııalardyń qatysýymen elimizde polıetılen, býtadıen, mıneraldy tyńaıtqyshtar jáne ózge de suranysqa ıe joǵary tehnologııalyq ónimder óndiretin zamanaýı zaýyttar salynýda. «Tatneftpen» avtokólik shınalaryn, al «KAMAZ-ben» júk kólikterine arnalǵan quramdas bólshekter óndirisi jolǵa qoıylǵan, — dep atap ótedi Qazaqstan Prezıdenti.

Memleket basshysynyń málimetinshe, Qazaqstanda reseılik kapıtaldyń qatysýymen 20 myńnan astam kompanııa tabysty jumys isteıdi. Al bul jaı ǵana tsıfr emes, ózara tıimdi seriktestiktiń naqty nátıjesi sanalady. Sonyń arqasynda jańa óndiris oryndary ashylyp, ondaǵan myń jumys orny qurylýda. Ozyq tehnologııalar transferi júzege asyrylyp, óńirler men halyqtar arasyndaǵy baılanystar nyǵaıyp keledi.

— Energetıka salasy yntymaqtastyǵymyzda aıryqsha oryn alady. Ortaq kúsh-jigerimizben Reseıdiń energetıkalyq resýrstarynyń Qytaı men Ortalyq Azııa elderine úzdiksiz tranzıtin qamtamasyz etip otyrmyz. Іri energetıkalyq nysandardy salý jáne jańǵyrtý jumystaryn júrgizip jatyrmyz. Bul rette «Rosatom» basqaratyn halyqaralyq konsortsıýmnyń qatysýymen Qazaqstanda alǵashqy atom elektr stansasyn salý zákirlik joba bolatyny sózsiz. AES qurylysy elimizge ýran óndirýden bastap elektr energııasyn shyǵarýǵa deıingi tolyq ıadrolyq otyn tsıklin qalyptastyrýǵa múmkindik beredi. Munan bólek, joba jańa tehnologııalardy transferleý, mamandardy oqytý, jańa jumys oryndaryn qurý, sondaı-aq mashına men aspaptar jasaý sııaqty aralas salalardy damytý úshin jańa múmkindik ashady, — dedi Memleket basshysy.

Esterińizge sala keteıik, Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen barady.