AES qurylysy máselesi 10 jyl buryn sheshilýi tıis edi — sarapshy
ASTANA. KAZINFORM — Elimizde AES qurylysyna qatysty máseleni 10 jyl buryn sheshý kerek edi. Bul týraly elordada ınnovatsııalyq jáne ornyqty damýdyń keshendi strategııasyna arnalǵan forýmda Klımattyń ózgerýi ortalyǵynyń dırektory Aıdyn Bakdolotov málim etti.
«Biz birazdan beri elimizge atom energetıkasy kerek ekenin aıtyp kelemiz. Meniń oıymsha, bul másele 10 jyl buryn sheshilýi tıis edi. Referendým AES salý turǵysynda oń sheshim bergenin eskere otyryp, endigi is-qımyldy jyldam júzege asyrǵan jón», — dedi A. Bakdolotov tilshiler suraǵyna jaýap bere otyryp.
Onyń paıymynsha, elimizge bolashaqta qoldanystaǵy jylý elektr (kómir jaǵatyn) stantsııalarynyń ornyna kem degende úsh AES salý kerek bolady.
«Bizde jańartylatyn energııa kózderin de, atom energetıkasyn da qatar damytý qajet. Bul ekeýin bir-birine qarsy qoıýǵa bolmaıdy, sebebi osy eki baǵyt ta taza energııa sanatyna jatady. Atom elektr energııasy damyǵan elderde burynnan paıdalanylyp keledi. Bul saladaǵy árbir elementtiń qaýipsizdigi qamtamasyz etilgen. Árıne, bastapqyda AES qurylysyna qomaqty ınvestıtsııa qajet bolady. AES salynǵannan keıin onyń uzaq merzimde energııa berýge qaýqarly ekenin nazarǵa alsaq, ol ózin aqtaı alady. Aldaǵy 15 jylda Qazaqstanda úsh AES bolýy kerek dep sanaımyn. Sebebi osy aralyqta bizdiń ekonomıkaǵa aýqymdy elektr energııasy qajet», — dedi sarapshy.
Onyń sózine qaraǵanda, elektr energııasynyń tarıfi qalaı bolǵanda da óse beredi, ıaǵnı bul jaǵdaı AES qurylysyna baılanysty emes. Sebebi elimizdegi jylý elektr stantsııalarynyń basym bóligi eskirgen.
«Eger Úkimet AES qurylysyna halyqaralyq konsortsıýmdy jumyldyrý sheshimin jasasa, onda birneshe el tartylýy múmkin. Halyqaralyq tájirıbe osyndaı sheshimder jasalyp jatty. Sondyqtan bizde de konsortsıým bolýy múmkin dep oılaımyn», — dedi Aıdyn Bakdolotov.
Aıta keteıik, búgin Ortalyq referendým komıssııasy 6 qazanda ótken respýblıkalyq referendýmnyń túpkilikti qorytyndysyn jarııalady.
Oǵan sáıkes, daýys berýge qatysqan azamattardyń 71,12 paıyzy nemese 5 561 937 adam Qazaqstanda atom elektr stansasyn salý máselesin qoldady. Al qarsy daýys bergender sany — 2 045 271 adam.
Jaqynda Memleket basshysy Qasym-Jomart Toqaev AES boıynsha referendýmda daýys bergennen keıin BAQ ókilderine shaǵyn suhbat berdi.
«Úkimet saraptamamen aınalysyp, tıisinshe kelissózder júrgizýi qajet. Degenmen, bul — máselege qatysty meniń jeke kózqarasym. Qazaqstanda eń ozyq tehnologııalarǵa ıe álemdik kompanııalardan turatyn halyqaralyq konsortsıým jumys isteýi tıis. Biraq, munan arǵyny ómir kórsetedi», — dedi Qasym-Jomart Toqaev.
