AES qurylysy: konsortsıým quramy áli qalyptasqan joq
ASTANA. KAZINFORM — QR Energetıka mınıstrligi qazir AES qurylysyndaǵy konsortsıým aıasynda 4 elmen kelissóz júrip jatqanyn málimdedi.
— Qazaqstannyń ońtústik óńirinde qýattylyǵy joǵary birinshi AES salý josparlanǵan. AES qurylysynyń keıingi jobalary úshin yqtımal merzimder, neǵurlym qolaıly aýmaqtar, oryn jáne reaktorlyq tehnologııalardy jetkizýshiler boıynsha sheshim óńirlerdiń elektr energııasyna qajettilikterin taldaý negizinde, sondaı-aq ekologııalyq, ekonomıkalyq jáne tehnologııalyq aspektilerdi eskere otyryp qabyldanady. Qazirgi ýaqytta atom elektr stantsııasyn salýdyń alǵashqy jobasy boıynsha konsortsıým quramy áli qalyptasqan joq, — delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, konsortsıým boıynsha sheshim qabyldaý básekelestik dıalog rásimine sáıkes júrgiziletin kelissózderdiń nátıjelerine baılanysty bolady. Bul yntymaqtastyqtyń barlyq aspektilerin — tehnıkalyq máselelerden ekonomıkalyq jáne quqyqtyq máselelerge deıin talqylaýǵa múmkindik beredi.
— Qazir Reseı, Frantsııa, Qytaı jáne Ońtústik Koreıa jetkizýshilerimen (vendor) konsortsıým aıasynda yntymaqtastyq múmkindikteri talqylanyp jatyr. Jetkizýshini nemese konsortsıýmdy tańdaý boıynsha túpkilikti sheshim kelissózder aıaqtalǵannan keıin, sondaı-aq jetkizýshilerdiń usynystaryn taldaǵannan keıin osy jyl ishinde jasalady, — dep naqtylady Energetıka mınıstrligi.
Eske salsaq, byltyr jeltoqsan aıynyń aıaǵynda Prezıdent Energetıka mınıstri Almasadam Sátqalıevti qabyldady.
QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Memleket basshysy Qasym-Jomart Toqaev aıtty Qazaqstan AES qurylysy úshin halyqaralyq konsortsıým qurý máselesin pysyqtap jatqanyn aıtty.
Aıta keteıik, byltyr kúzde Ortalyq referendým komıssııasy 6 qazanda ótken respýblıkalyq referendýmnyń túpkilikti qorytyndysyn jarııalady.
Oǵan sáıkes, daýys berýge qatysqan azamattardyń 71,12 paıyzy nemese 5 561 937 adam Qazaqstanda atom elektr stansasyn salý máselesin qoldady. Al qarsy daýys bergender sany — 2 045 271 adam.