AES qurylysy boıynsha konsortsıýmǵa ary ketkende 5 el kirýi múmkin
ASTANA. KAZINFORM – AES qurylysy boıynsha konsortsıýmǵa ary ketkende 5 el kirýi múmkin. Bul týraly Premer-Mınıstrdiń orynbasary Roman Sklıar aıtty.
«Menińshe, bul konsortsıýmda ary ketkende 5 el bolady. atom elektr stansasy – bul jaı ǵana bir nysan emes. Ol qurylymdyq bóliminde túrli elder kóshbasshy sanalatyn birqatar nysannan turady», - dedi ol Úkimet otyrysynan keıingi brıfıngte.
Onyń atap ótýinshe, stansany jobalaý barysynda túrli elderdiń eń ozyq tehnologııalaryn alý úshin jumys júrgiziledi. Soǵan oraı qurylys barysyna túrli kompanııalar, sýbmerdigerler jumyldyrylady. Álemde mundaı tájirıbe bar. Óıtkeni, ıadrolyq araldy bir el, týrbınany ekinshi el salýy múmkin.
«Sol sebepti biz qandaı da bir jetkizýshige, merdigerge qadalyp qalmaı konsortsıým qurýymyz qajet», - dedi Roman Sklıar.
Aıta keteıik, búgin Ortalyq referendým komıssııasy 6 qazanda ótken respýblıkalyq referendýmnyń túpkilikti qorytyndysyn jarııalady.
Oǵan sáıkes, daýys berýge qatysqan azamattardyń 71,12 paıyzy nemese 5 561 937 adam Qazaqstanda atom elektr stansasyn salý máselesin qoldady. Al qarsy daýys bergender sany – 2 045 271 adam.
