AES qurylysy boıynsha konsortsıým ónimdiligi joǵary tehnologııalardy tartýǵa yqpal etedi - sarapshy
ASTANA. QazAqparat – Belgili saıasattanýshy, sarapshy Talǵat Qalıev QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda kóterilgen taqyryptarǵa qatysty pikir bildirdi.
«Memleket basshysy ónimdi tereńdetip óńdeý salasyn damytý kerek ekenine jáne eksporttyq baǵytty keńeıtýge, sondaı-aq joǵary tehnologııalyq ekonomıkany qurýǵa qatysty erekshe toqtaldy. Bul turǵyda ınvestorlardy osy salalarǵa nazar aýdarýǵa shaqyrdy. Onyń ishinde agroónerkásiptik keshendi damytý eskerilgen. Máselen, agroónerkásip keshenin joǵary tehnologııalyq sektorǵa aınaldyrý baǵytynda sheteldik ınvestorlardyń úlesi bar quny 5 mlrd dollardan asatyn 100-den astam joba júzege asyrylady. Atap aıtqanda, elimizdegi agrarlyq sektordyń áleýeti óte zor. Bul rette, egin sharýashylyǵy men mal sharýashylyǵyn damytý úshin jer kólemi jetkilikti. Jalpy, Qazaqstannyń bul saladaǵy tájirıbesi barshylyq. Sondyqtan ınvestorlarǵa osy salalar qyzyq bolýy múmkin, sebebi azyq-túlik árqashan joǵary suranysqa ıe. BUU deregine súıensek, 2050 jylǵa qaraı azyq-túlikke degen suranys kólemi 2 esege artýy múmkin», - dedi T. Qalıev.
Budan bólek sarapshy Qazaqstannyń alǵashqy atom elektr stantsııasyn salý josparyna toqtaldy.
«Memleket basshysy qazirgi kezde osy jobany júzege asyrý úshin halyqaralyq konsortsıým qurý múmkindigi qarastyrylyp jatqanyn aıtty. Osy salaǵa ınvestorlar barynsha belsendi tartylady dep oılaımyn. Bul turǵyda qazir AES salýǵa qaýqarly kompanııalar joǵary básekelestikte qyzmet etip júr. Osy oraıda olar sońǵy býyndy tehnologııalardy usynýǵa tyrysady. Meniń oıymsha, Prezıdenttiń Sheteldik ınvestorlar keńesiniń otyrysynda aıtqan málimdemesi olardyń nazarynan tys qalmaıdy», - dedi saıasattanýshy.
Onyń paıymynsha, konsortsıým qurý bir ǵana tehnologııanyń aınalasynda shoǵyrlanýǵa jol bermeıdi. ıAǵnı naryqtaǵy eń qaýipsiz ári ónimdiligi joǵary tehnologııalardy irikteýge yqpal etedi.
Budan buryn habarlanǵandaı, Qazaqstan sheteldik ınvestorlardyń qatysýymen agroónerkásip kesheninde 5 mlrd dollardyń jobalary iske asyrylady.
QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Memleket basshysy Qasym-Jomart Toqaev aıtty Qazaqstan AES qurylysy úshin halyqaralyq konsortsıým qurý máselesin pysyqtap jatqanyn aıtty.
