Qazaqstanda alǵashqy AES qurylysy aıasynda óndiristi oqshaýlaý jospary talqylandy

ASTANA. KAZINFORM — QR Atom energııasy jónindegi agenttiginiń tóraǵasy Almasadam Sátqalıev birinshi atom elektr stansasynyń qurylysy aıasynda óndiristi oqshaýlaý máseleleri boıynsha múddeli memlekettik organdarmen kezekti keńes ótkizdi, dep habarlaıdy vedomstvonyń baspasóz qyzmeti.

Qazirgi ýaqytta Agenttik AES salý jónindegi strategııalyq jobany iske asyrýǵa júıeli daıyndyq júrgizip jatyr.

— Otandyq kásiporyndardy barynsha tartýdy qamtamasyz etý maqsatynda Memleket basshysynyń tapsyrmalaryn oryndaý sheńberinde Agenttik atom salasy úshin óndiristi oqshaýlaýdy damytý jónindegi Keshendi jospardyń jobasyn ázirledi. Qujatta normatıvtik bazany kezeń-kezeńimen qalyptastyrý, qazaqstandyq naryqtyń múmkindikterin taldaý, óndiristerdi jańǵyrtý jáne tsıfrlyq sheshimderdi engizý kózdelgen, — delingen habarlamada.

Keńes barysynda Keshendi jospardyń jobasy talqylanyp, sondaı-aq qujatty vedomstvoaralyq jumys sheńberinde ázirleý barysynda memlekettik organdar qalyptastyrǵan tásilder men usynystar qaraldy.

Buǵan deıin Qazaqstan men Serbııa beıbit atom energetıkasy boıynsha tájirıbe almasý múmkindigin qarastyratynyn jazǵanbyz.