AES qurylysy 2032 jyly 10 myńǵa jýyq adamdy jumyspen qamtıdy
ASTANA. KAZINFORM – Atom elektr stantsııasynyń qurylysy eldiń energetıkalyq qaýipsizdigin nyǵaıtýǵa jáne ornyqty ekonomıkalyq ósýdi qamtamasyz etýge baǵyttalǵan Qazaqstannyń negizgi ınfraqurylymdyq jobalarynyń birine aınalady.
Qazaqstanda elektr energııasyn tutyný jyl saıyn orta eseppen 3-4% - ǵa artady. Ásirese joǵary ósim eldiń ońtústik aımaqtarynda baıqalady, munda tutynylatyn elektr energııasynyń edáýir bóligi Soltústik energetıkalyq aımaqtan keletin aǵyndarmen jabylady.
Mundaı jaǵdaıda atom elektr stantsııasynyń qurylysy energııamen jabdyqtaýdyń uzaq merzimdi senimdiligin qamtamasyz etýge jáne ekonomıka men halyqtyń ósip kele jatqan qajettilikterin qanaǵattandyrýǵa qabiletti strategııalyq sheshim.
Joba óńirlerdiń áleýmettik-ekonomıkalyq damýyna aıtarlyqtaı áser etedi. Stantsııany salý jáne odan ári paıdalaný barysynda myńdaǵan jańa jumys oryndary qurylyp, kásibı oqytý jáne bilikti tehnıkalyq mamandardy daıarlaý múmkindikteri keńeıtiletin bolady.
Atom energetıkasyn damytý avtomobıl joldaryn, elektr jáne sýmen jabdyqtaý obektilerin, sondaı - aq áleýmettik ınfraqurylymdy — mektepterdi, balabaqshalar men medıtsınalyq mekemelerdi salýdy jáne jańartýdy qosa alǵanda, irgeles aýmaqtardyń ınfraqurylymyn jańǵyrtýǵa yqpal etetin bolady. Óńirlerdiń ınvestıtsııalyq tartymdylyǵynyń ósýi, shaǵyn jáne orta bıznestiń damýy, sondaı-aq jastar úshin jańa múmkindikterdiń paıda bolýy kútilýde.
Boljamdarǵa sáıkes, Almaty oblysynda AES salý jobasyn iske asyrý 2030 jylǵa qaraı 5 myńǵa jýyq adamdy jumys oryndarymen qamtamasyz etýge múmkindik beredi. 2032 jyly qurylys-montajdaý jumystarynyń shyńynda tartylǵan personal sany shamamen 10 myń adamǵa jetedi.
Stantsııa paıdalanýǵa berilgennen keıin 2035 jyly turaqty negizde 2 myńǵa jýyq jumys orny qurylady. Onyń ishinde 600 — ge jýyq mamannyń joǵary bilimi, 550-arnaýly orta bilimi jáne 850 — beıindi tehnıkalyq bilimi bolady.
Osyǵan uqsas mýltıplıkatıvtik áser Qazaqstanda jańa joǵary tehnologııalyq salany qalyptastyrýǵa jáne adamı kapıtaldyń uzaq merzimdi damýyn qamtamasyz etýge múmkindik beretin keıingi atom elektr stantsııalaryn salý jónindegi jobalardy iske asyrý kezinde de kútiledi.
Aıta ketelik Qazaqstandaǵy alǵashqy AES-ke qansha qarajat jumsalatyny týraly jazǵan edik.
