AES kompanııasyna kiretin kásiporyndardy memleket menshigine qaıtarý kerek - N. Sabılıanov
ASTANA. Qazannyń 6-sy. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Nurtaı Sabılıanov Úkimet basshysynyń atyna saýal joldap, AES kompanııasynyń quramyna kiretin birqatar kásiporyndardy memleket menshigine qaıtarý máselesin kóterdi.
«Shyǵys Qazaqstan oblysynda saılaýshylarmen kezdesý ótkizgende oblystyń eldi mekenderin, sonyń ishinde Óskemen jáne Semeı qalalaryn jylýmen jáne elektr energııasymen qamtamasyz etetin AES kompanııasynyń jáne onyń quramyna kiretin «Shyǵysenergotreıd» JShS-niń qyzmetine qatysty suraqtar jıi kóteriledi. Saılaýshylar tarapynan elektr jaryǵyna tarıftiń jyl saıyn ósýi, elektr jaryǵynyń durys berilmeı jıi óshirilýi, elektr qural-jabdyqtarynyń, qondyrǵylardyń tozǵany, kúrdeli jóndeý júrgizilmegeni, aýyldyq jerlerde elektrıkterdi qysqartýy jáne t.b. máseleler aıtylýda. Sheteldikterdiń qaraýyndaǵy bul kompanııalardyń is-áreketi halyqtyń narazylyǵyn týdyryp otyr», dedi depýtat.
Onyń aıtýynsha, QR Tabıǵı monopolııalardy retteý agenttiginiń aqparatyna sáıkes, AES kompanııasynyń jekeshelendirý mindettemelerin oryndamaýy - 459 mln. dollardy quraǵan. Sonyń ishinde «AES Shúlbi sý elektr stansysy» JShS - 396,5 mln. dollar, «AES Óskemen sý elektr stansysy» JShS - 37,97 mln. dollar, «AES Óskemen jylý elektr ortalyǵy» AQ - 21 mln. dollar bereshegi bar eken.
«Al atalǵan nysandardyń memleket menshiginde bolýy strategııalyq turǵydan, energetıkalyq qaýipsizdikti qamtamasyz etý turǵysynan mańyzdy. Sol úshin AES kompanııasynyń quramyna kiretin «AES Shúlbi sý elektr stansysy» JShS-in, «AES Óskemen sý elektr stansysy» JShS-in, «AES Óskemen jylý elektr ortalyǵy» AQ-yn jáne «Shyǵysenergotreıd» JShS-in memleket menshigine qaıtarý máselesin qarastyrýdy suraımyn», dedi depýtat.
