AES kompanııasy soǵys ardagerleri tutynǵan elektr energııasynyń aqysyn tólep bermek
ÓSKEMEN. QazAqparat - Qazaqstandaǵy AES kompanııalar toby jyl saıyn uıymdastyrylatyn Shyǵys Qazaqstan oblysyndaǵy Uly Otan soǵysynyń ardagerleri tutynǵan elektr energııasynyń qunyn tólep berý aktsııasyn bıyl da jalǵastyrmaq. Úsh aıda ardagerlerdiń esebine 2,9 mln teńge aýdarylady,-dep habarlady energetıkalyq kompanııa ókilderi «QazAqparat» HAA tilshisine.
Memlekettik zeınetaqy tóleý ortalyǵynyń málimetteri boıynsha, búgingi tańda óńirde 390 Uly Otan soǵysynyń ardageri turady. Bul sanattaǵy azamattardyń qataryna soǵysqa qatysýshylar men múgedekter, Lenıngrad blokadasynyń burynǵy turǵyndary, kontslagerlerdiń tutqyndary, maıdanda qaıtys bolǵandardyń jesirleri kiredi.
Uly Jeńistiń 72 jyldyǵyna oraı «Shyǵysenergotreıd» JShS-niń abonenti bolyp tabylatyn árbir ardagerge syılyq retinde 600 kVt/saǵat qýat beriledi. Sáýir, mamyr, maýsym aılaryna AES árbir ardagerdiń esebine 2500 teńgeden aýdarady. Zeınetaqy tóleý ortalyǵynan alynǵan jáne oblystyq ardagerler keńesimen maquldanǵan tizim elektr energııasy esebiniń málimetterimen sáıkestendirilgen.
Elektr qýatynyń quny tólengendigi jónindegi qujattarda «Qazaqstandaǵy AES toby tarapynan tólengen» degen jazý bolady.
AES kompanııalar tobynyń dırektory Dúısen Merǵalıevtiń sózinshe, 7 jyl buryn, ıaǵnı aktsııa iske qosylǵan ýaqyttan bastap, ardagerler tutynǵan qýattyń qunyn tóleý kompanııa ókilderi úshin eń mańyzdy áleýmettik jobalardyń birine aınalǵan.
«Bizge búgingideı ashyq aspan men beıbit ómirdi syılap ketken ardagerler kez kelgen syılyq pen maqtaýǵa laıyqty»,-dep esepteıdi ol.
