AES-ke qatysty jalpyulttyq referendým ótkizýge qajetti barlyq saraptama bar - Sátqalıev

AES qurylysyna qatysty jalpyulttyq referendým ótkizýge qajetti barlyq saraptama bar. Bul týraly Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Jumys ulttyq referendým týraly Konstıtýtsııalyq zańǵa sáıkes júrgizilip jatyr. Atalǵan referendýmdy ótkizýge jaýapty ókiletti organ bar. Biz Energetıka mınıstrligi retinde bul jumysty sarapshylyq qoldaýmen qamtamasyz etetin bolamyz. Jalpy, qajetti barlyq saraptama bar. Biz ony quziretti organǵa usynýǵa daıynbyz», - dedi Almasadam Sátqalıev XV KazEnergy Eýrazııalyq forýmynda agenttik tilshisine bergen suhbatynda.

Aıta keteıik, taıaýda Energetıka vıtse-mınıstri Jandos Nurmaǵambetov AES salý máselesi jónindegi referendým taǵaıyndaý quqyǵy Prezıdentke tıesili ekendigin aıtqan bolatyn.