AES-ke kadrdy shetelden shaqyrýdyń qajeti joq, ózimiz de daıyndap úlgeremiz – Saıabek Sahıev

ASTANA. KAZINFORM – Atom elektr stansasy salynǵan jaǵdaıda Qazaqstan otandyq kadrlardy daıyndap úlgeredi. Bul týraly Úkimet otyrysynda ıAdrolyq fızıka ınstıtýtynyń dırektory Saıabek Sahıev aıtty.

«Qazaqstanda 3 ortalyq bar. Osy úsh ortalyq elimizge 5 myń kadr daıyndap úlgerdi. Al atom elektr stansasyna bar-joǵy 1 400 ǵana kadr qajet eken. 5 myń kadr daıyndaǵan Qazaqstan AES úshin 1 400 kadr daıyndap úlgeredi. Ol úshin shetelden shaqyrýdyń qajeti joq dep oılaımyz», - dedi ol.

Osy rette ınstıtýt dırektory taıaýda elimizdiń barlyq aýmaǵynda AES salýǵa qatysty qoǵamdyq tyńdaýlar ótkenin eske saldy.

«Qazaqstan halqymen kezdesýlerde jıi qoıylǵan suraqtardyń biri qaýipsizdik, onyń ishinde radıatsııalyq qaýipsizdik jáne kadrlardy daıarlaý boldy. Jalpy, Qazaqstan tańdap otyrǵan sý-sý energetıkalyq reaktory alǵash ret 1957 jyly salynǵan. Sol ýaqyttan beri 415 reaktor jumys istep tur. Sonyń 200-den astamy – sý-sý reaktory. Onyń bárinde 67 jyldyń ishinde birde-bir tótenshe oqıǵa bolǵan emes. Shtattyq rejımde jumys istep keledi. Bul - qaýipsizdiktiń bir belgisi. Ekinshiden, ıAdrolyq fızıka ınstıtýtymyzdyń bazasynda sý-sý zertteý reaktory bar. Al MAGATE-niń AES pen zertteý reaktoryna qoıatyn talaby birdeı. 57 jyldyń ishinde kem degende úsh urpaq – ǵalymdar, ınjenerler aýysty. Demek, tek álem emes Qazaqstan da osy sý-sý reaktorlarynyń qaýipsiz ekenin dáleldep otyr», - dedi Saıabek Sahıev.

Onyń atap ótýinshe, 1980 jyldary ıAdrolyq fızıka ınstıtýty ornalasqan Alataý móltek aýdanynda 4 myńdaı adam turǵan. Qazir halyq sany 15 myńǵa jetti.

«2 jyl boldy, sonyń 50-ine eksperıment retinde detektor bergenbiz. Aptasyna, aıyna ólshemder júrgizip otyrady. 2 jyldyń ishinde normadan birde-bir aýysý baıqalǵan joq. Osynyń bári AES-tiń radıatsııalyq qaýipsiz ekenin dáleldeıdi», - dedi ol.