AES qaldyqtary Semeıdegi polıgonda kómilýi múmkin - B. Jaqsalıev

ASTANA. QazAqparat - Qazaqstanda salynatyn Atom elektr stansasynan shyqqan qaldyqtar Semeıdegi polıgonǵa kómiletin bolýy múmkin. Bul týraly búgin QR Parlamenti Májilisinde «Atom energııasyn paıdalaný týraly» zań jobasynyń tanystyrylymy barysynda QR Energetıka vıtse-mınıstri Baqytjan Jaqsalıev aıtty.

«Atom elektr stansalarynyń jumys jasaý qabilettiligi keminde 60 jyl bolady. Sondyqtan ony salýdy josparlap jatqannyń ózinde qaldyqtaryn qaıda kómý kerek degen másele týyndaıdy. Al Qazaqstanda mundaı qaldyqtardy kómetin jer Semeı synaq polıgony bolýy múmkin», - dedi B. Jaqsalıev jýrnalısterdiń suraqtaryna jaýap berý kezinde.

Onyń aıtýynsha, búginde adamzat balasy atomdyq qaldyqtardy basqalaı zalalsyzdandyrýdyń joldaryn áli taba qoıǵan joq.

«Qaldyqtardy zalalsyzdandyrý máselesi óte kúrdeli, degenmen qazir álem boıynsha onyń naqty sheshimi joq. Búgingi tańda Qazaqstanda qaldyqtardy kómý máselesi onsha qıyndyq týǵyzyp otyrǵan joq. Burynyraqta Aqtaý qalasynda istep turǵan BN-350 reaktorynan shyqqan qaldyqtar da osy Semeıdegi polıgonǵa kómilgen. Osy kómý ornynyń tıimdiligi men qaýipsizdigi únemi baqylanyp otyrady jáne kórsetkishteri MAGATE belgilegen standarttardyń barlyǵyna jaýap beredi», - dep qorytyndylady B. Jaqsalıev.