AES eldegi ǵylym men ónerkásipke serpin beredi - Almasadam Sátqalıev
ALMATY. KAZINFORM – Qazaqstanda atom energetıkasyn damytý elektr energııasynan bólek otandyq ónerkásip, ǵylym jáne adam kapıtalyna jańa múmkindikter ashady. Bul týraly Atom energııasy agenttiginiń tóraǵasy Almasadam Sátqalıev málimdedi.
Onyń aıtýynsha, atom elektr stansalaryn salý - Qazaqstannyń jańa tehnologııalyq baǵytqa bet burýynyń, ǵylymı quzyretterdi damytýdyń jáne otandyq óndiristiń tehnologııalyq deńgeıin arttyrýdyń alǵyshartyna aınalady.
— Árıne, atom energetıkasyn damytýdyń ózi ǵylymı quzyretterdi damytýdy, óndiristiń jańa damý deńgeıin boljaıdy. Bul atom stansalaryn salýdyń biregeı tájirıbesin alýǵa, otandyq ónerkásip pen ındýstrııany damytýǵa múmkindik beredi, - dep atap ótti Almasadam Sátqalıev Antalıada ótken «Álemdik atom kúnderi – 2026» forýmynda.
Onyń sózinshe, salanyń damýy Atom energııasy jónindegi halyqaralyq agenttiktiń (MAGATE) standarttaryna sáıkes Qazaqstanda ǵana emes, shetelde de qyzmet kórsetý múmkindikterin ashady.
Otandyq ǵylymı-zertteý reaktorlarynyń bazasynda ǵylymı klasterlerdi qurý - áleýeti joǵary baǵyttardyń biri bolmaq. Radıatsııalyq tehnologııalardy medıtsınada, aýyl sharýashylyǵynda jáne ónerkásiptik dıagnostıkada qoldaný aıasyn keńeıtýge erekshe nazar aýdarylady.
Agenttik basshysy bul baǵyttardy damytý jańa kásibı quzyretterdi qalyptastyrýǵa múmkindik beretinin jáne adam kapıtalynyń damýyna yqpal etetinin atap ótti.
MAGATE-men yntymaqtastyq
Almasadam Sátqalıev Qazaqstanda atom energetıkasyn damytý aıasynda Atom energııasy jónindegi halyqaralyq agenttikpen birge júrgiziletin jumys týraly aıtyp berdi.
— Biz MAGATE-men tyǵyz baılanystamyz, jyl saıyn tıisti saraptamalyq jáne baqylaý jumystary ótkiziledi. Biz MAGATE-niń atom energııasyn beıbit maqsatta paıdalanýǵa baılanysty baǵdarlamalaryna qosyldyq, - dedi agenttik tóraǵasy.
Ol Qazaqstannyń atom energııasyn beıbit maqsatta paıdalaný salasyndaǵy halyqaralyq yntymaqtastyqtyń eleýli tájirıbesine ıe ekenin atap ótti. Bul rette eldiń tarıhı sheshimderi, atap aıtqanda álemdegi tórtinshi ıadrolyq arsenaldan bas tartýy, sondaı-aq beıbit atomdy damytý jónindegi halyqaralyq jobalarǵa qatysýy mańyzdy ról atqardy.
Eske salaıyq, buǵan deıin Atom energııasy agenttiginiń tóraǵasy Almasadam Sátqalıev Qazaqstanda úshinshi AES salynýy múmkin alańdardy atady. Eldiń shyǵys jáne batys óńirlerimen qatar, soltústik bóligi de qarastyrylyp jatyr.
