AES boıynsha jarııalanǵan konkýrs áli kúshinde – Almasadam Sátqalıev

ASTANA. QazAqparat – Energetıka mınıstri Almasadam Sátqalıev búgin Úkimet otyrysynan keıin tilshilerge bergen suhbatynda AES qurylysyna qatysty pikir bildirdi, dep habarlaıdy QazAqparat tilshisi.

«Úkimettiń nazarynda turǵan jobalardyń biri – Atom elektr stansasyn salý. Tıisti Jol kartasy bar, qazir sonyń aıasynda nysan salynatyn oryndy tańdaý jóninde qoǵamdyq tyńdaý ótedi. Ári qaraıǵy sheshim sol qoǵamdyq tyńdaýdyń qorytyndysy boıynsha jáne Úkimettiń sarapshylarmen aqyldasýynan keıin qabyldanady. «Qazaqstan atom elektr stansalary» qazir ótkizip jatqan konkýrs áli kúshinde. Ol jerde birneshe áleýetti qatysýshy bar. AES salý týraly talaı aıttyq. Konkýrsqa qatysýshylardyń qataryn keńeıttik jáne Jol kartasy aıasynda jumys istep jatyrmyz», - dedi Energetıka mınıstri.

Eske salsaq, buǵan deıin «Samuryq-Qazyna» AQ basqarma tóraǵasy Nurlan Jaqypov AES qurylysy týraly aıtpas buryn áýeli «Ondaı nysan Qazaqstanǵa kerek pe?» degen saýalǵa jaýap berý qajettigin aıtqan edi.