AES boıynsha referendýmǵa qatysty BAQ-ta zań normalaryn saqtamaýdyń 14 faktisi anyqtaldy
ASTANA. KAZINFORM – AES boıynsha referendýmǵa qatysty BAQ-ta zań normalaryn saqtamaýdyń 14 faktisi anyqtaldy. Bul týraly Ortalyq referendým komıssııasynyń otyrysynda Mádenıet jáne aqparat vıtse-mınıstri Qanat Ysqaqov aıtty.
«Búgin Mádenıet jáne aqparat mınıstrligi tarapynan respýblıkalyq referendýmǵa daıyndyq barysynda atqarylǵan jumystarǵa toqtalyp ótkim keledi. Osy kezeńde Mınıstrliktiń aldyna eki negizgi mindet qoıylǵan edi: birinshi mindet – referendýmǵa shyǵarylǵan suraq, sondaı-aq referendýmdy uıymdastyrý aspektileri boıynsha halyqpen keń aýqymdy aqparattyq-túsindirý jumystaryn júrgizý bolsa, ekinshisi – buqaralyq aqparat quraldary jáne onlaın-platformany paıdalanýshylardyń referendým aldyndaǵy úgit jumystaryn júrgizý kezinde zańnamalyq talaptardy saqtaýyn qamtamasyz etý», - dedi vıtse-mınıstr.
Onyń atap ótýinshe, irinshi mindetti iske asyrý aıasynda referendýmǵa daıyndyq jáne ony ótkizý barysy týraly halyqty aqparattandyrý boıynsha mınıstrlik úlken jumys júrgizdi.
Referendýmǵa daıyndyqty aqparattyq qamtamasyz etýge respýblıkalyq jáne óńirlik telearnalar, gazetter, sondaı-aq respýblıkalyq jáne óńirlik deńgeıdegi ınternet-resýrstar qatysty. Ekinshi mindet aýqymynda Qazaqstan Respýblıkasynyń respýblıkalyq referendým týraly zańnamasy talaptarynyń saqtalýyn baqylaý maqsatynda aqparattyq salaǵa táýlik boıy monıtorıng júrgizý uıymdastyryldy. Referendým naýqanyna monıtorıng júrgizý 6 qazanda aıaqtalady.
«Monıtorıng BAQ jáne onlaın-platformalardy paıdalanýshylardyń kelesi úsh negizgi talapty saqtaýyn qamtamasyz etý maqsatynda júrgizildi. Birinshisi - anonımdi úgit materıaldaryn ornalastyrýǵa tyıym salý, ıaǵnı úgit materıaldaryn shyǵarǵan uıym, basylyp shyǵarylǵan orny jáne taralý sany, shyǵarýǵa jaýapty tulǵalar týraly málimetterdi qamtıtyn tıisti túrde tańbalanbaǵan materıaldar. Ekinshisi – qoǵamdyq pikirge saýalnama júrgizý tártibine qoıylatyn talaptardy saqtaý. Úshinshisi - Respýblıkanyń konstıtýtsııalyq qurylysyn kúshtep ózgertý, onyń tutastyǵyn buzý, memlekettiń qaýipsizdigine nuqsan keltirý, áleýmettik, násildik, ulttyq, dinı, tektik-toptyq jáne rýlyq arazdyqty qozdyrý, qatygezdik pen zorlyq-zombylyqty úgitteýge jol bermeý. Monıtorıng júrgizý barysynda, «Respýblıkalyq referendým týraly» jáne «Qazaqstan Respýblıkasyndaǵy saılaý týraly» Zań normalaryn saqtamaýdyń 14 nyshany, onyń ishinde 13 buzýshylyq onlaın-platformalarda, 1 buzýshylyq ınternet-basylymda anyqtaldy. Anyqtalǵan buzýshylyqtar saýalnamalar men olardyń nátıjelerin ornalastyrýmen baılanysty boldy», - dedi Qanat Ysqaqov.
