AES ataýyna qatysty 28 myńnan astam usynys tústi – Almasadam Sátqalıev

ASTANA. KAZINFORM — Elimizde salynatyn birinshi Atom elektr stansasynyń ataýyna qatysty 28 myńnan astam usynys tústi. Bul týraly Atom energetıkasy jónindegi agenttik tóraǵasy Almasadam Sátqalıev málim etti.

- Baıqaý aıaqtalý satysynda tur. Qazaqstan azamattarynan 28 myńnan astam usynys aldyq. Úlken qyzyǵýshylyq baıqaldy. Qazir «Ulttyq aqparattyq tehnologııalar» AQ-pen birge ótinimderdiń qurylymyn túsiný úshin jan-jaqty taldaý jumystary júrgizilip jatyr. Eń aldymen ornalasý óńirin, jasyn, genderlik máselelermen baılanysty sanatyn túsinip alǵymyz keledi. Sodan keıin baıqaý komıssııasynyń qorytyndy otyrysyn ótkizý arqyly jınaqtaý jumysy júrgizilip, Balqash stansasynyń túpkilikti ataýy aıqyndalady, - dedi agenttik basshysy Aqordada BAQ ókilderiniń saýalyna oraı.

Onyń atap ótýinshe, usynystardyń ishinde tarıhı, geografııalyq ataýlar, tarıhı tulǵalardyń esimderi, tehnologııalyq sheshimdermen baılanysty óte tanymal ataýlar bar. Osy oraıda ol komıssııa múshelerine belgili bir deńgeıde yqpal etpeý úshin keıbir tanymal ataýlardy ataýdan bas tartty.

- Buǵan deıin komıssııa ataýǵa tolyqtaı saı kelýi tıis birqatar ólshemshartty aıqyndaǵan bolatyn. Kópke birdeıligi negizgi ólshemsharttardyń biri. Munan bólek, atom salasynyń ımıdjine sáıkestigine baılanysty máseleler de bar. Ol Qazaqstan halqy úshin mádenı-tarıhı qundylyqtardy da pash etýi tıis. Olardyń áýezdi, qysqa, qazaq, orys jáne aǵylshyn tilderinde azamattarǵa barynsha túsinikti bolýy aıryqsha mańyzdy. Munyń bári sheshim qabyldaý barysynda nazarǵa alynady, - dedi Almasadam Sátqalıev.

AES ataýyna qatysty usynystardy qabyldaý 2025 jylǵy 10 qazan saǵat 23:59–da aıaqtaldy. Bastamanyń basty maqsaty — bolashaq stantsııanyń tarıhı, mádenı jáne ulttyq mańyzyn beıneleıtin ataýdy tańdaý.

Aıta keteıik, Qasym-Jomart Toqaev Fınlıandııa Prezıdentin Aqordada qarsy aldy.